Procesi i përzgjedhjes së guvernatorit të BQK-së, po vlerësohet se pati parregullsi për listën e ngushtë të kandidatëve

Procesi i përzgjedhjes së listës së ngushtë të kandidatëve për pozitën e të parit të Bankës Qendrore të Kosovës (BQK), po vlerësohet se është përcjellë me parregullsi.

Të gjitha këto pretendime i ka përmbledhur një mendim të ndarë nga anëtarët tjerë, kryesuesi i panelit për përzgjedhjen e kandidatëve, Flamur Mrasori.

Mrasori, i cili tashmë nuk është në pozitën e kryetarit të Bordit të BQK-së, ka adresuar parregullsi gjatë procesit të përcaktimit të listës së kandidatëve të propozuar për Kuvend dhe Qeveri për t’u përzgjedhur në pozitën e guvernatorit.

Në dokumentin e siguruar nga Reporteri, Mrasori që kishte qenë në cilësinë e Kryetarit të Panelit, është ankuar për diskriminim të kandidatëve që kanë qenë të përfshirë në këtë proces duke e bërë kështu procesin juridikisht të pasigurt.

Më 25 janar kur edhe kishte përfunduar procesi i intervistimit të kandidatëve dhe është bërë renditja e tyre në bazë të poentimit, brenda Panelit kanë ekzistuar tre propozime (propozimi me tre, katër dhe pesë kandidatë) për listën përfundimtare të kandidatëve që do të përcillen në Kuvendin dhe Qeverinë e Kosovës për procedim të mëtejmë.

Propozimi që është miratuar me shumicë votash ka qenë propozimi që lista përfundimtare të përfshijë katër kandidatë që t’i propozohen Kuvendit të Kosovës, për çka Mrasori thotë se ka dhënë votën kundër.

Ai pretendon se lista me katër kandidatë është dërguar për në Kuvend, pavarësisht faktit që kandidatët e renditur sipas poentimit përfundimtar me renditjen në listën ranguese 4 dhe 5 kishin qenë absolutisht me pikë të barabarta duke mos u respektuar kështu “Parimi i barazisë para ligjit”.

“Lidhur me këtë propozim, vota ime është kundër, andaj edhe parashtroj këtë mendim të ndare. Ligji për BQK-në (neni 38 paragrafi 2) kërkon decidivisht që Kuvendit t’i përcillet lista me kandidatët se cilët konsiderohet se kanë përmbushur kriteret sipas Ligjit. Që do të thotë se bazë esenciale për pasqyrimin e përmbushjes së këtyre kritereve është rezultati final i procesit të intervistimit dhe poentimi përkatës. Njëherësh Ligji nuk kufizon numrin e kandidatëve të cilët i propozohen Kuvendit. Ndërlidhur me këtë, Paneli ka shqyrtuar dhe ka vendosur me një votë kundër (vota ime) që në Kuvend te dërgohet lista me katër kandidatë dhe atë pas rangimit të përgjithshëm të kandidatëve përmes procesit intervistues pra me datë 25 janar 2023″, thuhet në letrën e Mrasorit.

“Mbështetur në këtë rrethanë dhe duke pasur parasysh rangimin e kandidatëve (poentimin), kam propozuar që në Kuvend të përcillet lista me pesë (5) kandidate pasi që kandidatët e ranguar sipas poentimit përfundimtar më renditjen në listën ranguese 4 dhe 5 janë absolutisht me pikë të barabarta dhe arsyeja e votës sime kundër është fakti që të respektohet “Parimi i barazisë para ligjit si njëri ndër parimet fundamentale kushtetuese për të evituar pabarazinë në trajtim mbi çfarëdo bazë dhe për të penguar diskriminimin eventual”, vijon ai.

Mrasori në këtë dokument kërkon nga institucionet që ndërlidhën me këtë proces, të ndërmarrin veprimet e duhura që të sigurohet barazia dhe mosdiskriminimi i kandidatëve që janë pjesë e këtij procesi duke e bërë kështu këtë proces juridikisht të sigurt dhe të parrëzueshëm në çfarëdo rrethanash.

“Për të evituar cenimin e parimit në fjalë, është përgjegjësi e te gjitha institucioneve që ndërlidhën më këtë proces, të ndërmarrin veprimet e duhura që të sigurohet barazia dhe mosdiskriminimi i kandidatëve që janë pjesë e këtij procesi. Për fund, përfshirja e kandidatit/es të pestë (i/e pa përfshirë në listën e të propozuarve në Kuvend) me pikë absolutisht të barabarta me kandidatin/en e katërt (i/e përfshirë në listën e të propozuarve në Kuvend), do të përbënte listën e kandidatëve të cilësuar si të emërueshëm edhe nga Paneli edhe nga projekti i mbështetur nga Ambasada Britanike, për më tepër dhe në veçanti do të evitonte cenimin e “Parimit të barazisë para ligjit” duke bërë procesin juridikisht të sigurt dhe të pa rrëzueshëm në çfarëdo rrethanash”, përfundon Mrasori.

Në listën e emrave që Banka Qendrore e Kosovës i ka dërguar në Qeveri dhe Kuvend për t’u përzgjedhur në pozitën e guvernatorit të ri të këtij institucioni janë Ahmet Ismaili, Nexhat Kryeziu, Lulzim Ismajli e Shkëndije Himaj.

Sipas shpalljes që ishte bërë nga BQK-ja, emërimi do të jetë për një mandat pesë vjeçar duke filluar më 29 mars 2023 ose në datën e emërimit.

Aktualisht, BQK-ja udhëhiqet nga Mehmeti. Këtij të fundit i skadon mandati në mars të vitit të ardhshëm e që ishte emëruar më 2018. /Telegrafi/