Delegacioni i Parlamentit Evropian për dialog ndërpartiak, që po qëndrojnë në Serbi, u kanë thënë kolegëve të tyre në Parlamentin serb se çfarë mund të ndodhë nëse Serbia nuk është konstruktive në arritjen e një marrëveshjeje përfundimtare gjithëpërfshirëse me Kosovën.
“Nëse marrëveshja nuk pranohet, Serbia nuk do të jetë ishull, por Irani në Evropë”, transmeton media serbe “N1”, duke cituar fjalët e një deputeti të Parlamentit Evropian.
Sipas medias serbe, eurodeputetët thonë se presidentit të Serbisë në takimin me pesëshen ndërkombëtare më 20 janar i është thënë se hyrja e Serbisë në BE mund të arrihet në vitin 2030 dhe se kjo paketë duhet të zbatohet për të gjitha vendet e Ballkanit Perëndimor.
Delegacioni i Parlamentit Evropian për dialog ndërpartiak, i udhëhequr nga Vladimir Bilcik dhe Matjaz Nemec, po qëndron për vizitë në Serbi.
Gjatë paradites kanë biseduar me deputetë në Kuvendin e Serbisë.
Presidenti i Serbisë ka bërë të ditur se është takuar me Vladimir Bilçik dhe Matjazh Nemac. “Një shkëmbim i sinqertë i mendimeve për përparimin e mëtejshëm të Serbisë në procesin e integrimit evropian”, ka shkruar Vuçiqi në Instagram. /Telegrafi/
