Policia mbylli ‘tregun më të madh të paligjshëm në botë’, kishte më shumë se 500 mijë përdorues

Autoritetet thonë se platforma darknet kishte gjysmë milioni përdorues, ku tregtoheshin droga, para të falsifikuara, të dhëna të kartave të kreditit të vjedhura, karta SIM anonime dhe viruse. Operatori i dyshuar u arrestua në Gjermani.

Prokurorët gjermanë në qytetet Koblenz dhe Oldenburg thanë të martën se ata kishin mbyllur atë që ishte “ndoshta tregu më i madh i paligjshëm në Darknet” i quajtur DarkMarket dhe arrestuan njeriun që besohej se e operonte atë pranë kufirit të Gjermanisë me Danimarkën, transmeton Telegrafi.

Burri i ndaluar, që besohet të jetë operatori i DarkMarket, është një shtetas australian 34-vjeçar.

Autoritetet thonë se drogat, paratë e falsifikuara, të dhënat e vjedhura të kartave të kreditit, kartat anonime SIM dhe viruse, ishin tregtuar të gjitha në këtë faqe, e cila kishte një gjysmë milioni përdorues dhe biznes të transaksionuar në kriptovaluta ekuivalente me një vlerë prej 140 milionë euro (170 milionë dollarë).

Policia e Oldenburgut tha se sulmi ndodhi gjatë fundjavës. “Hetuesit ishin në gjendje të mbyllnin tregun dhe të fiknin serverin të hënën”, thanë prokurorët.

Autoritetet thonë se hetimi që zbuloi DarkMarket përfshiu një operacion të zbatimit të ligjit ndërkombëtar për disa muaj.

Agjencitë amerikane si FBI, divizioni i zbatimit të ligjit të narkotikëve DEA dhe autoriteti tatimor IRS të gjithë kontribuan në hetim, së bashku me policinë nga Australia, Britania, Danimarka, Zvicra, Ukraina dhe Moldavia, me Europolin që luante një “rol koordinues”.

“Një total prej të paktën 320,000 transaksionesh janë kryer përmes tregut, me më shumë se 4,650 Bitcoin dhe 12,800 Monero – dy prej kriptomonedhave më të zakonshme”, shtuan autoritetet Oldenburg. /Telegrafi/