Përfundon ultimatumi i SASHK-ut për MASH-in, Ademi në takim me sindikalistët

Sindikata e pavarur për arsim, shkencë dhe kulturë dhe Ministria e Arsimit dhe Shkencës sot duhet të ulen në tryezën negociuese, pasi skadoi afati shtatëditor që të hënën e kaluar ia dha MASH-it, kryetari i SASHK-ut, Jakim Nedelkov dhe paralajmëroi se nëse nuk pranohen kërkesat e tyre për rritjen e rrogave, do të ketë grevë të përgjithshme në shkollat fillore dhe të mesme.

Ministri i Arsimit, Arbër Ademi të shtunën në manifestimin “Ndërtojmë ura” deklaroi se është optimist dhe se beson se marrëveshja me SASHK-un do të arrihet. Ministri, i cili sot sërish do të takohet me krerët e SASHK-ut, tha se nuk dëshiron të mendojë në skenare të këqija lidhur me paralajmërimin e Sindikatës për grevë të përgjithshme, nëse nuk plotësohen kërkesat e tyre.

Në shkollat fillore dhe të mesme këtë vit mësimi filloi një ditë më vonë, për shkak të grevës paralajmëruese të arsimtarëve, anëtarë të SASHK-ut dhe atyre që u solidarizuan me ta. Grevistët në ditën e parë shkollore erdhën pa obligime, ndërsa ata që nuk iu bashkangjitën grevës, e kanë mbajtur mësimin.

SASHK më 30 shtator i dha edhe një javë MASH-it para se të vendos nëse do ta pranojë ofertën për rritjen e rrogave në veprimtarin arsimore. Nëse nuk plotësohen kërkesat e tyre, ka paralajmëruar grevë të përgjithshme në shkollat fillore dhe të mesme.

“Nga MASH na kërkuan kohë shtesë për negociata ku konfirmohet përqindja e rritjes së rrogave dhe koha kur kjo do të ndodhte. Sqaruan se u nevojitet kohë për llogari dhe konsultime me institucione tjera. Kemi vendosur të japim shtatë ditë”, deklaroi atëherë kryetari i SASHK-ut, Jakim Nedelkov.

Arsimtarët nuk janë të kënaqur nga rritja prej pesë për qind të rrogave dhe kërkojnë rroga më të mëdha për 25 për qind. Ata kërkojnë rritja të vlejë nga janari i vitit të ardhshëm./Telegrafi/