Pëlhurën e mbetur nga jastëkët e ajrit, Subaru e transformon në qese për blerje

Prodhuesi japonez i veturave, Subaru ka ripërdorur materialin e mbetur nga prodhimi i jastëkëve të ajrit në qese blerjesh të ripërdorshme – dhe nëse jetoni në Japoni, mund ta blini një të tillë.

Qeset e blerjeve shiten në dyqanin japonez në internet të Subaru, por prodhohen nga Toyoda Gosei – një prodhues japonez i pjesëve të automobilave, i cili është pjesërisht në pronësi të Toyota-s, por gjithashtu furnizon komponentë për makinat Subaru.

Ato kanë një çmim prej afro 19 eurove, dhe Subaru se dërgesat janë në dispozicion vetëm për shtetin japonez, raporton Drive, përcjell Telegrafi.

Subaru thotë se qeset e supermarketeve janë prodhuar nga “pëlhurë e papërdorur që supozohej të instalohej si jastëk ajri në një veturë”, dhe kanë theksime blu ose rozë me vija reflektuese në dorezat e saj.

Thuhet se ato janë 550mm të gjata, 340mm të gjera dhe 120mm të thella dhe janë mjaft të mëdha për të mbajtur një peshqir.

Qeset e markës Subaru janë pjesë e një game më të gjerë produktesh të ricikluara të prodhuara nga Toyoda Gosei, duke përfshirë çanta ‘tote’ të bëra nga materialet e lyera të jastëkëve të ajrit, me rripa sigurie të përdorura si doreza.

Kompania shet gjithashtu kuleta të bëra prej lëkure të destinuara për timonin e makinave dhe vitin e kaluar përdori prerjet e mbetura të jastëkëve të ajrit për të krijuar një palë këpucë vrapimi. /Telegrafi/