LAJMI I FUNDIT:

Ministria e Bujqësisë e pakënaqur me inspektimet për Ligjin për Kontrollin e Duhanit

Ministria e Bujqësisë e pakënaqur me inspektimet për Ligjin për Kontrollin e Duhanit
(Foto: HelpGuide)

Ministri i Bujqësisë, Faton Peci, duke folur për Ligjin për kontrollin e duhanit, ka thënë se numri i inspektorëve do të rritet.

Ai ka shtuar se rreth 20 inspektorë shtesë do të rekrutohen në Ministrinë e Bujqësisë ku përfshihet edhe Agjencia e Ushqimit dhe Veterinës (AUV).

“Në kuadër të buxhetit dhe organogramit të aprovuar, diku i kemi mbi 20 nëse s’gaboj, 27 janë nëpër agjenci të ndryshme brenda institucionit që unë drejtoj, kemi me i sistemu gjatë vitit 2023 për shkak të nevojave që ekzistojnë”, ka thënë ai.

Më tej Peci ka shtuar se ka inspektuar edhe punën në terren se sa po respektohet Ligji i duhanit, duke shtuar që nuk është i kënaqur me atë që ka parë.

“I kam inspektu unë inspektorët në mënyrën se si po i realizojnë inspektimet dhe me gjendjen që e kam parë në terren s’jam i kënaqur. Një numër i konsiderueshëm i inspektorëve e kanë një moshë bukur të shtyrë, e në disa qytete kam parë njëfarë familjarizimi që nuk është i lejueshëm dhe i dëshirueshëm mes mënyrës si komunikojnë inspektorët dhe afaristët”, tha më tej ministri i Bujqësisë në emisionin Kallxo Përnime.

Ai ka propozuar që të ketë rrotacion të inspektorëve.

“Gjysma e lokaleve në Ferizaj p.sh. e respektojnë Ligjin në plotni dhe gjysma tjetër jo. Njëri nga ata që më shoqëruan mua për të parë gjendjen tek ato vende që nuk respektohej ligji, u kërcënua në prezencë të Policisë ku në Ferizaj po thoshin që i zoti i lokalit ish njeri i fortë, dhe askush nuk po mundte t’i shqiptonte gjobën madje edhe inspektorët po hezitonin me shku”, tha Peci.