Pas më shumë se një dekade, Assad i Sirisë do të marrë pjesë në samitin e Ligës Arabe në Arabinë Saudite

Presidenti sirian Bashar al-Assad do të marrë pjesë në një samit të Ligës Arabe të premten në Arabinë Saudite, tha kryediplomati i tij, i pari në më shumë se një dekadë lufte dhe izolimi rajonal.

“Ai do të vijë për të marrë pjesë në këtë samit”, tha ministri i Jashtëm sirian Faisal Mekdad për televizionin libanez Al-Jadeed të mërkurën kur u pyet për pjesëmarrjen e Asadit, duke folur në margjinat e një takimi të ministrave të jashtëm arabë në Jeddah.

Samiti i këtij viti do të shënojë ripranimin e Sirisë së shkatërruar nga lufta në ligën prej 22 anëtarësh pas një pezullimi 12-vjeçar.

Anëtarësimi i Sirisë u “pezullua” pas shtypjes brutale të Asadit ndaj protestave masive të vitit 2011 kundër sundimit të tij.

Vendi u gjend shpejt në një luftë civile që ka vrarë gati gjysmë milioni njerëz dhe ka zhvendosur gjysmën e popullsisë së paraluftës të vendit prej 23 milionësh.

Ministri i Jashtëm i Arabisë Saudite, Princi Faisal bin Farhan tha të mërkurën se rajoni është në një udhëkryq, duke u përballur me një mori sfidash. Ai bëri thirrje për bashkëpunim midis vendeve arabe për të arritur sigurinë, stabilitetin dhe prosperitetin ekonomik.

Bin Farhan mirëpriti gjithashtu kthimin e Sirisë, ashtu si Sekretari i Përgjithshëm i Ligës Ahmed Aboul Gheit dhe Ministri i Jashtëm algjerian Ahmed Attaf. /Telegrafi/