Pas agresionit rus në Ukrainë, Lajçak kërkon mbështetjen e Britanisë për Ballkanin Perëndimor

Pas situatës në Ukrainë, emisari special i Bashkimit Evropian për dialogun Kosovë-Serbi, Miroslav Lajçak, ka udhëtuar drejt Londrës.

Në një shkrim në Twitter, bëri të ditur se ka takuar ministrin britanik për Europë, James Cleverly, emisarin për Ballkanin Perëndimor, Sir Stuart Peach dhe ekspertët britanikë për politikën e jashtme.

Lajçak tha se tani më shumë se kurrë është e rëndësishme mbështetja e Ballkanit Perëndimor dhe më gjerë.

“Sapo përfundova vizitën time në Londër. Pati diskutime shumë thelbësore dhe të detajuara me ministrin për Evropë, James Cleverl, dhe të dërguarin e Mbretërisë së Bashkuar, Sir Stuart Peach me ekspertët. Mbështetja për qëllimet dhe vlerat tona të përbashkëta në Ballkanin Perëndimor tani është më e rëndësishme se kurrë”, shkroi Lajçak.

Lidhur me këtë, i dërguari i Shteteve të Bashkuara për Ballkanin Perëndimor, Gabriel Escobar, ka thënë se Perëndimi nuk duhet të lejojë Rusinë që të përdorë luftën e saj në Ukrainë për të penguar përparimin e shteteve në Ballkanin Perëndimor.

“Rusia nuk është duke synuar interesat më të mira të këtyre shteteve. Ekonomitë tuaja janë të lidhura në Evropë. Partnerët më të mëdhenj tregtarë dhe investitorët janë në Bashkimin Evropian. E ardhmja juaj është në Evropë, si vende anëtare të Bashkimit Evropian”, ka thënë Escobar sipas një deklarate të publikuar nga Ambasada amerikane në Beograd.

“Ka ende shumë punë për të bërë në Ballkanin Perëndimor. Punë për të integruar rajonin në aspektin ekonomik. Punë për të gjetur kompromise dhe zgjidhje të qëndrueshme për çështjet e pazgjidhura kufitare. Le ta shfrytëzojmë këtë krizë për të siguruar gjeneratat e së ardhmes në Ballkanin Perëndimor që të jetojnë në shtetet e integruara plotësisht në Bashkimin Evropian dhe në një Evropë të lirë dhe në paqe.

Escobar ka theksuar se Shtetet e Bashkuara dëshirojnë të jenë partnere të këtij rajoni në këto përpjekje.

“Ne duhet të shfrytëzojmë këtë shembull për të dyfishuar përpjekjet për të arritur marrëveshje kompromisi në mes të Kosovës dhe Serbisë dhe të ndalim veprime që kërcënojnë stabilitetin dhe përparimin në Bosnje-Hercegovinë”, u shpreh ai.

Zyrtari amerikan ka thënë se Rusia duhet të mbahet përgjegjëse dhe se Perëndimi duhet t’i ndihmojë Ukrainës që të luftojë pushtimin rus para se të rriten mizoritë dhe që Evropa të destabilizohet edhe më shumë./Telegrafi/

Just wrapped up my visit to London. Had very substantial & detailed discussions with Minister for Europe @JamesCleverly, UK Envoy Sir Stuart Peach & @FCDOGovUK experts. Standing up for our shared goals & values in the Western Balkans & elsewhere is now more important than ever.

— Miroslav Lajčák (@MiroslavLajcak) March 8, 2022