LAJMI I FUNDIT:

Parandalohet futja e mbi 35 mijë eurove të padeklaruara në Vërmicë

Parandalohet futja e mbi 35 mijë eurove të padeklaruara në Vërmicë

Dogana e Kosovës ka njoftuar të premten se ka parandaluar futjen ilegale të mbi 35 mijë eurove nga pikë-kalimi kufitar në Vërmicë.

Sipas njoftimit, gjatë pyetjes zyrtare drejtuesi i automjetit ka mohuar se posedon ndonjë gjë për deklarim.

“Pas kësaj, mjeti është përzgjedhur për një kontroll të detajuar në vijën e dytë të procedurës së kontrollit. Si rezultati i kontrollit janë gjetur mjete monetare të padeklaruara në vlerë prej 35,200.00 Euro”, thuhet në komunikatën për media.

Tutje thuhet se paratë ishin të fshehura në pjesën e brendshme të xhaketës, të ndara në pesë pjesë.

“Për të theksuar, pala për mjete monetare nuk ka paraqitur asnjë dokumentacion lidhur me prejardhjen e tyre. Në përputhje me ligjin, është konfiskuar një shumë prej 8,800.00 Euro, që përfaqëson 25% të vlerës totale të mjeteve monetare. Pjesa tjetër e mjeteve monetare është ndaluar deri në përmbylljen e procedurave të mëtejshme”, bëhet e ditur në njoftim.

Sipas Doganës, ky veprim është ndërmarre në përputhje me detyrimet ligjore dhe procedurat e Kodit Doganor të Kosovës, “duke dëshmuar vendosmërinë e institucionit doganor për luftën ndaj tentativave të paligjshme të transportit të mjeteve monetare në territorin e vendit”. /Telegrafi/