Rreth 170,000 vetë ndoqën paradën e "anijeve me vela të mëdha" të shtunën në qytetin port të Kielit në veri të Gjermanisë, sipas organizatorëve.
Kjo ishte 20,000 më shumë se viti i kaluar, ndërsa moti ideal i lundrimit u cilësua si arsyeja kryesore për rritjen e numrit të spektatorëve, tha një zëdhënëse e qytetit, përcjell Telegrafi.
Mbi 120 anije morën pjesë, përfshirë 59 anije tradicionale me vela, me anijen stërvitore Gorch Fock prej 82 metrash që udhëhoqi flotën.
Gorch Fock u kthye në portin e tij pas një lundrimi stërvitor jashtë vendit dhe falë një leje të veçantë, kapiteni Elmar Bornkessel e lundroi me shpejtësi rreth 6.5 nyje detare (rreth 12 km/orë).
Anijet nisën paradën nga porti rreth orës 11:00 dhe lundruan në formacion mes Kiel-Schilksee dhe Laboe, me njerëz që ndoqën ngjarjen jo vetëm nga toka, por edhe nga anijet në ujë.
Parada e anijeve është kulmi detar i Javës së Kielit, që përfundon të dielën në mbrëmje. /Telegrafi/
