Një komb i vetëshpallur hapësinor që dëshiron të operacionalizojë një shoqëri plotësisht funksionale në hapësirë, ka filluar shtrirjen e vizionit për krijimin e një kolonie jashtë tokës.

E ashtuquajtura Mbretëria Hapësinore e Asgardia është një projekt i mirëfilltë për të ngritur një komb të tërë në hapësirë, me qindra mijëra anëtarë që paguajnë tarifat e “rezidencës” dhe një parlament që është në proces të formimit të themeleve për shoqërinë e tij, trasnmeton Telegrafi.

Sipas një shkrimi të Business Insider, qëllimi i Asgardia është të transportojë mijëra njerëz në një stacion të jashtëzakonshëm hapësinor deri në vitin 2043, përtej juridiksioneve të Tokës – dhe “të ndërtojë një shoqëri të re demokratike”.

Në mënyrë ambicioze, kombi i hapësirës po pret edhe pëlqimet e CEO-s të Teslas, Elon Musk, si dhe CEO-s të Amazon, Jeff Bezos, për t’i arritur ato qëllime. Të dy miliarderët kanë krijuar edhe firma hapësinore komerciale.

Elon Musk deklaron se ndërtimi i "qytetit të banueshëm" në planetin Mars kërkon njëmijë anije kozmike dhe 20 vjet për përfundim Elon Musk deklaron se ndërtimi i "qytetit të banueshëm" në planetin Mars kërkon njëmijë anije kozmike dhe 20 vjet për përfundim

Projekti, i themeluar nga miliarderi shkencëtar dhe politikan rus Igor Ashurbeyli, aktualisht kryesohet nga ish-politikani britanik Lembit Opik.

Por a mundet që ëndrra e Asgardia të bëhet ndonjëherë realitet?

Në një intervistë për Business Insider, Opik tregoi një pasion artizanal, duke detajuar çdo aspekt të shoqërisë së tij të bazuar në hapësirë, duke përfshirë një përmbledhje të politikës së jashtme, rregullimin bankar, mundësitë e biznesit dhe krijimin e një monedhe të re dixhitale të quajtur “Solar”.

Asgardia dëshiron të bëhet një komb tregtar i plotë, megjithëse Lembit Opik nuk planifikon të jetojë atje.

“Së pari, do të ketë biznese që operojnë brenda vetë Asgardias, dhe ne kemi marrë tashmë një listë të vogël të kandidatëve atje, të cilët mund të na japin mallra dhe shërbime”, tha ai.

“Atëherë sigurisht, do të ketë biznese që duan të na shesin gjëra, si Musk apo Bezos … Nëse ju keni një raketë të madhe dhe mund të na çojë në hapësirë, ne mund ta blejmë atë nga ju”, shtoi ai.

Asgardia u themelua nga Ashurbeyli në vitin 2016, ose “Viti 0” në kalendarin Asgardian, dhe tani krenohet me një organ të zgjedhur prej 150 anëtarësh nga e gjithë bota, pas zgjedhjeve në internet vitin e kaluar. Kryeministre e saj në detyrë është Ana Diaz, një avokate nga Venezuela, dhe drejtor kryesor i saj është Zhao Yun, një avokat tjetër nga Hong Kong. Opik u votua vitin e kaluar si kryetar i parlamentit.

Ashurbeyli kuptohet se ka investuar rreth 12 milionë dollarë të parave të tij në projekt deri më tani, ndërsa 2 milionë dollarë të tjerë janë paguar nga anëtarët e publikut.

Aktualisht, Asgardia ka tre nivele anëtarësh: “ndjekës”, “banorë” dhe “qytetarë”.

Sipas Opik, më shumë se një milion ndjekës tashmë janë regjistruar falas në të gjithë botën, ndërsa 300,000 të tjerë po paguajnë tarifën e qëndrimit vjetor prej 100 € (110 $). Këtë fundjavë, ai dhe kolegët e tij në parlamentin Asgardian do të debatojnë se sa do të paguajnë për nënshtetësinë (d.m.th. ata që kanë të drejtë të jetojnë në Asgardia kur të fillohet).

“Ne po planifikojmë për një afat të gjatë”, tha ai. “Kështu që ne duhet të sigurohemi që të bëjmë gjithçka absolutisht në rregull”.

Opik shtoi se ai nuk planifikon të qëndrojë përgjithmonë në Asgardia vetë, nëse ai do të fillojë të ekzistojë, edhe pse ai do ta vizitojë.

“Më mirë të isha një udhëtues ditor se një shtëpiak”, tha ai. “Detyra ime është të ndihmoj krijimin, ​​por ndoshta nuk vendosem atje vetë”.

Në vitin 2017, Mbretëria dërgoi satelitin e saj të parë në orbitën e Tokës, duke e bërë atë, fjalë për fjalë, “kombin e parë që ka të gjithë territorin e tij në hapësirë”.

Sateliti i vogël, Asgardia-1, aktualisht po “lundron” rreth Tokës. Ai përmban një hard disk 512 GB, që përmban “simbolet kombëtare dhe të dhënat e zgjedhura personalisht të shtetësisë asgardiane”.

Të gjithë miliarderët e teknologjisë kanë shënuar rritje të pasurisë gjatë vitit 2019 - përveç atij që është njeriu më i pasur në botë Të gjithë miliarderët e teknologjisë kanë shënuar rritje të pasurisë gjatë vitit 2019 - përveç atij që është njeriu më i pasur në botë

Madje, sipas rregullave të Kombeve të Bashkuara, shkruan Business Insider, transmeton Telegrafi, Asgardia teknikisht mund të kualifikohej për njohjen si shtet, pasi më shumë se 100,000 njerëz duken të vendosur për të aplikuar për nënshtetësi. Por nuk ka të ngjarë që të njihet si një komb sovran tani për tani.

Business Insider më parë kishte kontaktuar me Zyrën e Kombeve të Bashkuara për Hapësirë të Jashtme (UNOOSA) për të sqaruar nëse ligji aktual i hapësirës do të lejojë ekzistencën e një kombi ose territori në hapësirë.

Neni II i pjesës së parë dhe më të rëndësishme të këtij kuadri ligjor, të quajtur Traktati i Hapësirës së Jashtme, ndalon “përvetësimin kombëtar” të çdo gjëje në hapësirën e jashtme “me pretendimin e sovranitetit, me anë të përdorimit ose okupimit, ose me ndonjë mjet tjetër”.

Por Opik mbetet optimist përkundër kundërshtimit, duke thënë se projekti “ka marrë aq shumë nga jeta e tij”.

Pasi të vendoset, ai këmbëngul se Asgardia do të marrë një qëndrim neutral për të gjitha çështjet tokësore.

“Ne nuk do të ndërhyjmë në çështjet tokësore dhe shpresojmë që ata të mos ndërhyjnë në tonën … Ne dëshirojmë atë që dëshiron çdo komb sovran: njohjen”, ka thënë ai.

Gjithsesi, së paku deri më tani, Blue Origin, ndërmarrja hapësinore e Jeff Bezos, nuk ka pranuar të komentojë. Po ashtu edhe Elon Musk nuk i është përgjigjur një kërkese për koment. /Telegrafi/