Pa transferime deri në vitin 2018, gaboi Reali që nuk bleu apo skuadra është e fortë që t’i bëjë ballë një vendimi të tillë?

Real Madridi nuk do të mundë të transferojë lojtarë në dy afatet e ardhshëm kalimtarë, sipas një vendimi të FIFA-s, pasi klubi është akuzuar për shkeljen e rregulloreve në lidhje me mbrojtjen dhe transferimin e lojtarëve nën moshën madhore.

Ky vendim vjen pas një afati kalimtar, në të cilin Los Blancos thuajse aspak nuk participuan. Aktiviteti i vetëm i tyre gjatë verës ishte blerja e Alvaro Moratas nga Juventusi.

Së bashku me Atletico Madridin, Mbretërve iu ishte kumtuar suspendimi më herët, porse ata kishin apeluar, ndërsa FIFA i ka hedhur poshtë ankesat e dy klubeve nga kryeqyteti spanjoll.

Lexo po ashtu Zyrtare: FIFA zyrtarizon dënimet për Real Madridin dhe Atleticon

Duke pasur parasysh se mund të dënoheshin, krerët e klubit është dashur që të investonin më shumë gjatë kësaj vere.

Shfrytëzimi i klauzolës për riblerjen e Moratas, inkuadrimi i Marco Asensios në ekipin e parë dhe kthimi i Fabio Coentraos nga huazimi te Monaco – është aktivitet u ulët në tregun e transferimeve për një klub të madh si Reali.

Pritet të shihet nëse veprimi i Los Blancos do ta ndëshkojë suksesin e skuadrës, apo ndoshta ekipi është mjaft i fortë që t’i bëjë ballë një vendimi të tillë të FIFA-s. /Telegrafi/