Ndërsa zgjedhjet e brendshme në LDK po zhvillohen, tashmë ka nisur gara nëpër komuna se kush do bëhet kryetar dege. Një garë tejet e fortë pritet të ndodh në Prizren.

Dy deputetë tejet të njohur kanë paralajmëruar se do t’i futen garës për të marrë drejtimin e degës. Bëhet fjalë për Anton Quni e Driton Selmanaj.

Por qysh tashmë kanë nisur përkrahjet për njërin kandidat nga figura të larta të LDK-së.

Kryetari në largim i Degës së LDK-së në Prizren, Haxhi Avdyli, përmes një foto publikuar në Facebook krah Anton Qunit sikur i ka dhënë përkrahje publike këtij të fundit. Në foto krahë Qunit, kanë dalë edhe Vjosa Osmani e Armend Zemaj.

Kjo përkrahje nëse mund të quhet e tillë për Qunin ka ndodhur me rastin e përvjetorit të 29-të të themelimit të LDK-së në Prizren.

“Të nderuar pjesëmarrës në manifestimin e përvjetorit e 29 të degës së LDK-së ,në emër timin personal dhe të bashkëpunëtorëve, ju falënderoj për pjesëmarrjen tuaj në këtë festë. Me rikthimin e LDK- së , ky vend ka shpresë. #vazhdojmë bashkë drejt ndryshimit”, ka shkruar Avdyli në Facebook që është kryetar aktual i Degës por që ka bërë të ditur nuk do të kandidon edhe për një mandate, me arsyen se sa ka qenë kryetar dege LDK-ja nuk ka arritur ta marrë pushtetin në zgjedhjet e fundit lokale.

Kujtojmë se ditë më parë deputeti Selmanaj ndërsa foli për kandidaturën e Qunit tha se është i gatshëm i nderuar që është përballë tij.

“Ka kohë që i jam ofruar anëtarësisë dhe kam shpreh gatishmërinë që të jem pjesë e garës për kryetar të degës në Prizren. Ndjehem i nderuar edhe jashtëzakonisht mirë që do të jem në garë me zotëri Anton Qunin”, kishte thënë Selamanj.

Ndërsa Quni ditë më parë konfirmoi garën për kreytar të LDK-së në Prizren.

“Po, është e vërtetë. Në mbledhjen të kryesisë së LDK-së, dega në Prizren, unë e kam bërë publike kandidaturën për kryetar të degës në Prizren” ka deklaruar Quni.

Mbetet të shihet nëse do ketë dhe kandidatura tjera për kryetar të LDK-së në këtë qytet. Edhe nëse nuk ka të tjerë, gara sërish do jetë tejet e forte mes Qunit dhe Selmanajt.