Nuk sprapset Sokoli: Derisa Real Madridi u mposht nga Gramozi, pse të mos fitojë edhe Feronikeli ndaj Milanit!

Profesori universitar dhe trajneri i futbollit, Bylbyl Sokoli, i cili mbrëmë ka shkaktuar polemika me deklaratën se “Milan nuk fiton ndaj Ferronikelit”, sonte ka shkuar edhe më tej duke kujtuar humbjen e Real Madridit në Tiranë.

Sokoli, në emisionin “Dueli Sportiv” në RTV Dukagjini ka thënë se deklarata e tij se “Ferronikeli nuk do të humb ndaj Milanit”, ka pasur të bëjë më shumë me karakterin miqësorë dhe që nuk është në plan të parë rezultati.

“Jam i sigurt se dy palët do të tentojnë të jenë të kënaqura…Askush nuk bjer nga grupi e as nga vazhdimi i garave të mëtejme”.

Trajneri i futbollit ka kujtuar edhe humbjen e Real Madridin në Tiranë ndaj Gramozit të Ersekës.

“Duhet të përkujtojmë kur ka ardhur Real Madridi me Raulin, e Ronaldon dhe gjithë emrat e mëdhenj në Tiranë dhe ka humbur ndeshjen 2-1 ndaj Gramosit të Ersekës. Pse Ferronikeli të mos fitojë kundër Milanit, me një ekip që qëllimi është revyja e futbollistëve që do të jenë pranë publikut të Kosovës”.

Sokoli ka thënë se nga ndeshja Ferronikeli – Milan do të përfitojnë të gjithë. Për Milanin ai ka thënë se do të jetë një kënaqësi nga mikpritja që dinë të ofrojnë vetëm shqiptarët./Telegrafi/