Njohësit e sigurisë: Ligjet avancojnë FSK-në në ushtri (Video)

Njohësit e çështjeve të Sigurisë vlerësojnë se projektligjet për transformimin e FSK-së në ushtri do ta ngrisin shumë këtë forcë. Sipas tyre kalimi i këtyre projektligjeve është dashur të ndodh shumë më herët.

Miratimi i tri ligjeve për Forcën e Sigurisë së Kosovës, në Komisionin parlamentar për Siguri, nga njohësit e sigurisë në vend po shihen si ligje të mirëseardhura të cilat avancojnë FSK-në në ushtri.

Njohësi i çështjeve të sigurisë, Avni Islami, shprehet për RTV Dukagjinin se këto projektligje të cilat do të dërgohen në Parlament, është dashur shumë më herët që të shtyhen para.

“Projektligjet duhet të përpunohen dhe pas kalimit në kuvend, FSK do të merr kompetenca shtesë, dhe jo vetëm si deri tash që kishte vetëm misione për shpëtim, por FSK të jetë forcë mbrojtëse dhe të shtrihet në gjithë territorin”, tha ai.

Edhe njohësi tjetër, çështjeve të sigurisë, Nuredin Ibishi, thotë se procedimi i këtyre projektligjeve ka rëndësi të madhe, ngase vendi është në proces të integrimeve evropiane. E, për mundësinë që ushtria të jetë obligative ai pati këtë përgjigje.

“Tash është një tendencë e re që ky sistemi i ushtrive profesionale të transformohet gradualisht në sistem të mobilizimit të rregullt me përfshirje gjithë qytetare”, tha Nuredin Ibishi, përcjell Telegrafi.

Njohësi i çështjeve të sigurisë , Avni Islami shprehet se për Kosovën aktualisht, FSK duhet të jetë ushtri profesioniste, e më pas të bëhet edhe obligative.

“Është më e mirë që të jetë një ushtri profesioniste e paguar mirë, e trajnuar mirë nga NATO, por në një të ardhme pse të mos bëhet obligative si rasti i Zvicrës ose shteteve të tjera”, tha Islami.

Ndërkaq edhe të rinjtë, kishin qëndrime të ndryshme nëse do të donin të ishin pjesë e ushtrisë së ardhshme të Kosovës.

Tri ligjet për FSK-në, ajo për Shërbimin në FSK, për Ministrinë e Mbrojtjes si dhe për Forcën e Sigurisë së Kosovës, tashmë do t’i dërgohen Kuvendit për miratim./Telegrafi/