Një tjetër sensacion pritet të arrijë në Evropë nga MLS, Juventus dhe Roma pas mbrojtësit amerikan

Kampionati amerikan MLS është bërë shumë atraktiv viteve të fundit dhe futbolli në Amerikë ka marrë vëmendjen e duhur.

Shumë skuadra janë organizuar mirë derisa në këtë kampionat kanë zbarkuar yje të mëdha të futbollit.

Por edhe klubet kanë punuar shumë në akademi të tyre dhe lojtarët nga Amerika tani po lënë gjurmë në Evropë.

Emri më i ri që pritet të arrijë në Evropë është ai i mbrojtësit të djathtë amerikan, Bryan Reynolds.

19-vjeçari ka shkëlqyer edicionin e fundit në MLS duke zgjuar interesimin e skuadrave të njohura evropiane.

Ai ka oferta nga Belgjika, Holanda, Franca, por dy klubet më të mëdha që janë vënë pas tij janë Juventusi dhe Roma.

Dy gjigantët italianë kanë nisur bisedimet me Dallasin për të transferuar yllin e ri amerikan.

Mediat italiane kanë raportuar se skuadra amerikane Dallas është gati ta lejoj largimin e Reynolds për një shumë prej gjashtë milionë euro.

Reynolds dallohet për shpejtësinë e tij të jashtëzakonshme dhe në Amerikë po konsiderohet si një ‘Alphonso Davies’ i ri për krahun e djathtë të mbrojtjes.

Mbetet të shihet nëse lojtari do të arrijë gjatë janarit në Evropë dhe si do të ambientohet pasi futbolli evropian ka dallim të madh me atë amerikan. /Telegrafi/