Një qytetar amerikan kidnapohet nga një grup i lidhur me talebanët në Afganistan

Një kontraktues amerikan u kap nga militantët e lidhur me talebanët në Afganistan javën e kaluar, duke shkaktuar një përpjekje për kërkim në gjithë vendin.

Kështu shkruan Newsweek, sipas të cilit medium, Mark R. Frerichs nga Lombard, Illinois, u rrëmbye të premten e kaluar në Khost, një provincë e vendosur në pjesën juglindore të vendit që kufizohet me Zonat Fisnore të Administruara Federale, një rajon i pazhvilluar midis Afganistanit dhe Pakistanit.

Kjo gjë, sipas po të njëjtit medium është bërë e ditur nga zyrtarë amerikanë, të cilët folën në anonimitet sepse nuk ishin të autorizuar të diskutonin detajet publikisht, përcjell Telegrafi.

Frerichs, 57 vjeç, është një ish zhytës i Marinës së SHBA-së dhe drejtori menaxhues për Ndihmën Logjistike Ndërkombëtare, një kontraktues qeveritar i SHBA.

Sipas llogarisë së tij të LinkedIn, ai ka punuar si inxhinier civil në disa zona konflikti nga Iraku në Sudan gjatë 10 viteve të fundit, ku ai është konsultuar për kontratat logjistike si për qeveritë ashtu edhe për organizatat joqeveritare.

Zyrtarët e SHBA-së kanë thënë, po sipas Newsweek, se Frerichs kishte udhëtuar rregullisht në Afganistan që nga viti 2012.

Ndërsa asnjë grup nuk ka marrë përgjegjësinë për rrëmbimin, zyrtarët e SHBA-së besojnë se rrjeti Haqqani i lidhur me talebanët orkestroi operacionin.

Newsweek shkruan se nuk ishte në gjendje të përcaktonte saktësisht se si u kap Frerichs, por përpjekjet për ta gjetur dhe rikuperuar atë përfshijnë një përpjekje të përbashkët nga Departamentet e Shtetit dhe Mbrojtjes, së bashku me Byronë Federale të Hetimit. /Telegrafi/