‘Një moment historik’: Reagimet e para pasi Erdogan i Turqisë pranoi të mbështesë anëtarësimin e Suedisë në NATO

Turqia ka rënë dakord të përcjellë në parlament kërkesën e Suedisë për t’u bashkuar me aleancën ushtarake të NATO-s, tha Sekretari i Përgjithshëm, Jens Stoltenberg në prag të samitit të NATO-s në Vilnius.

“Jam i lumtur të njoftoj se presidenti (Recep Tayyip) Erdogan ka rënë dakord të përcjellë protokollin e pranimit për Suedinë në asamblenë e madhe kombëtare sa më shpejt të jetë e mundur dhe të punojë ngushtë me asamblenë për të siguruar ratifikimin”, tha Stoltenberg në një konferencë shtypi të hënën.

Stoltenberg nuk pranoi të jepte një datë se kur do të ratifikohej pranimi i Suedisë nga parlamenti turk, asambleja e madhe kombëtare, e cila do të vendoste për kohën e saktë.

Sipas mediave të huaja, përcjell Telegrafi, miratimi i Turqisë erdhi pasi Stokholmi ra dakord të krijonte një mekanizëm dypalësh sigurie me Ankaranë, tha Stoltenberg.

Suedia do të mbështesë gjithashtu procesin e BE-së të Turqisë, liberalizimin e vizave dhe përpjekjet për përditësimin e Bashkimit Doganor, shtoi ai.

Ai tha se NATO po krijon, për herë të parë, postin e Koordinatorit Special kundër Terrorizmit.

Suedia përsëriti se nuk do të mbështesë “organizatat terroriste YPG/PYD dhe FETO”, thuhet në një deklaratë të përbashkët pas takimit mes Turqisë, Suedisë dhe shefit të NATO-s, shkruan më tej Trt World.

Dhe menjëherë ka ardhur reagimi i aleatëve.

Presidenti amerikan Joe Biden ka mirëpritur marrëveshjen e presidentit turk Rexhep Tajip Erdogan për të mbështetur kërkesën e Suedisë për t’u anëtarësuar në NATO.

“Jam gati të punoj me presidentin Erdogan dhe Turqinë për rritjen e mbrojtjes dhe parandalimit në zonën euro-atlantike”, tha Biden në një deklaratë, duke shtuar: “Mezi pres të mirëpres kryeministrin Kristersson dhe Suedinë si aleatin tonë të 32-të të NATO-s”.

Ministrja e Jashtme gjermane Annalena Baerbock gjithashtu e ka mirëpritur vendimin, duke thënë: “Rruga për ratifikimin e anëtarësimit të Suedisë në NATO nga ana e Turqisë është më në fund e qartë”, shkroi Baerbock, duke përshëndetur “lajmin e mirë nga Vilnius”.

Ndërkohë kryeministri britanik Rishi Sunak e quan vendimin e Turqisë “një moment historik për NATO-n që na bën të gjithëve më të sigurt”.

Ndryshe, Finlanda dhe Suedia aplikuan për anëtarësim në NATO menjëherë pas fillimit të luftës në Ukrainë në shkurt të vitit 2022.

Turqia ka miratuar anëtarësimin e Finlandës në NATO.

Për t’u bashkuar me NATO-n, Suedia ka nevojë për miratimin e të gjithë anëtarëve të saj aktualë, duke përfshirë Turqinë, e cila ka qenë në aleancë për më shumë se 70 vjet. /Telegrafi/