Një familje nga Kalifornia kaloi një pushim 17-ditor në Evropë pa ‘bagazhin e tyre të humbur nga kompania ajrore’ – ja si ia dolën deri në fund!

Një familje nga Kalifornia u detyrua të shpenzonte pothuajse 1600 euro për rroba të reja pasi duhej të kalonin të gjithë pushimet e tyre evropiane pa asnjë bagazh.

Sipas mediave të huaja, përcjell Telegrafi, në qershor, Steve Gomez, gruaja e tij dhe dy djemtë e tij u nisën nga San Diego në një udhëtim 17-ditor në Evropë, i cili përfshinte një lundrim shtatë-ditor.

Ata fluturuan me Air Canada nëpërmjet Torontos për në Romë dhe fluturimet e tyre pësuan vetëm vonesa të vogla.

Ndërsa ata arritën në kryeqytetin italian më 18 qershor, bagazhi i tyre nuk kishte ardhur.

Kështu, Gomez kontaktoi Aviapartner, e cila merret me bagazhet e linjës ajrore, për të raportuar çantat e tyre të humbura.

“Duke pasur zero bagazh për katër persona, na u desh të shpenzonim disa qindra dollarë në dy ditët e para vetëm për të pasur veshje të mjaftueshme për të kaluar ditën. Planet tona të udhëtimit ishin të qëndronim në Romë për dy netë – më pas hipja në një lundrim shtatëditor nga Roma”.

Sipas gjurmuesit të bagazheve të Air Canada, bagazhi i tyre mbërriti të nesërmen në Romë.

Por Gomez tha: “Ishte e pamundur të kontaktosh dikë. Telefoni i partnerit ose rezultoi në një sinjal të zënë ose nuk u përgjigj kurrë – përgjigje nuk kishte as përmes email”.

Business Insider shkruan se shqyrtoi deklaratat bankare dhe faturat e rezervimit që tregonin se familja shpenzoi pothuajse 20,000 dollarë për pushimet e tyre.

Dhe si pasojë e mos ardhjes së bagazhit, familja shpenzoi pothuajse 1600 dollarë për rroba të reja, pajisje tualeti, valixhe dhe shpenzime lavanderie.

Pas përpjekjeve të shumta të dështuara për të folur me dikë për bagazhin e tyre, gjurmuesi i bagazheve tregoi se çantat e tyre do të dërgoheshin në Napoli për të përkuar me ndalimin e parë të lundrimit të tyre në Salerno më 21 qershor.

Por Gomez tha se bagazhi nuk u shfaq as atje.

“Familja jonë prej katër anëtarësh kaloi lundrimin e plotë prej 7 ditësh, plus 4 ditë në Athinë dhe 2 ditë në Venecia pa bagazh – gjithsej 17 ditë pa sendet tona që nga dita kur u nisëm”.

Pesë ditë pasi u kthyen në San Diego, atyre iu tha se ishte gjetur një çantë, kështu që Gomez udhëtoi me makinë dy orë për ta marrë atë nga aeroporti.

Të nesërmen ai mori një telefonatë për një çantë tjetër, që kërkonte një udhëtim tjetër.

Deri më 12 korrik, ata më në fund i kishin gjetur të gjitha çantat e tyre. /Telegrafi/