Nga kampioni, te Kupa e Kosovës dhe skuadrat që bien nga elita: Robert Gjeraj parashikon Superligën e Kosovës

Superliga e Kosovës në futboll ka startuar dhe pritet të jetë një edicion spektakolar, duke parë lëvizjet e skuadrave në këtë afat kalimtar dhe ndeshjet në këto xhirot e para.  

Gara për titull, Kupa e Kosovës, por edhe dalja në Evropë dhe mbijetesa do të jetë shumë e nxehtë deri në fund të sezonit 2024/24.

Ish-futbollisti i njohur, dikur pjesë edhe e Kombëtares së Kosovës tanimë i pensionuar nga futbolli, Robert Gjeraj ka parashikuar për fundin e sezonit 2024/25 në Albi Mall Superligën e Kosovës.

Duke iu përgjigjur disa pyetjeve nga redaksia e sportit në Telegrafi, Gjeraj ka parashikuar se kush shpallet kampion, kush del në Evropë, fituesin e Kupës së Kosovës, por edhe skuadrat që bien nga elita.

Gjeraj që si lojtar karrierë ka bërë në shumë klube të mëdha të Kosovës, si  Vëllaznimi, Liria dhe Besa, e sheh Dritën si kampione të Kosovës për edicionin 2024/25, derisa Dukagjinin si fitues të Kupës së Kosovës. Gjithnjë sipas prizrenasit në garat evropiane do të dalin Drita, Ballkani, Prishtina dhe Dukagjini.

View this post on Instagram

A post shared by Telegrafi Sport (@telegrafisport)

Ish-mbrojtësi i gjithanshëm ka parashikuar që nga elita do të largohen Feronikeli ’74 dhe Ferizaj, derisa si befasinë për të mirë e sheh Suharekën, duke besuar se mund ta rrëzojë nga pozitat evropiane njërën nga katër të lartë përmendura.

Tutje, njëri nga lojtarët me më shumë paraqitje në futbollin kosovar ka parashikuar se sulmuesi i Prishtinës, Sunday Akinbule do të shpallet top shënues në edicionin 2024/25, derisa lojtari që duhet parë sipas tij është mbrojtësi i ri i kryeqytetasve, Ardi Ajdini.

Ylli i Malishevës, Etnik Brruti është lojtari që do të befasojë për të mirë këtë edicion në Superligë sipas Robert Gjerajt. /Telegrafi/