Nga De Bruyne e Salah – gjashtë futbollistët që u larguan nga Chelsea dhe u bënë yje botërore

Secilën herë që Kevin De Bruyne apo Mohamed Salah shpallen futbollistë të ndeshjes, tifozët e Chelseat pikëllohen. Dikur emra si këta konsideroheshin si dështime të Blutë, kurse tani ata janë yje të klasit botëror.

Më poshtë jua sjellim listën me gjashtë futbollistët, të cilët u larguan nga Stamford Bridge për t’u bërë emra të mëdhenj të futbollit në klubet pasuese:

Kevin De Bruyne

(Chelsea 2012-2014)

Aktualisht një prej mesfushorëve më të mirë në planet, belgu konsiderohej i papërshtatshëm te Chelsea. Madje gjatë kohës sa ishte te Blutë edhe u huazua te Werder Bremeni, pastaj i transferua te Wolfsburgu dhe nga viti 2015 është pjesë e Manchester Cityt ku po shkëlqen.

Mohamed Salah

(Chelsea 2014-2016)

Egjiptiani iu bashkua Bluve në vitin 2014 nga Baseli, mirëpo luajti vetëm 13 herë në Ligën Premier, pastaj u huazua te Fiorentina dhe Roma, për të nënshkruar më pas kontratë afatgjate me Giallorossët. Ngritja e jashtëzakonshme në formë te klubi italian bëri që Liverpooli ta kthente në Angli dhe pjesa tjetër është histori.

Arjen Robben

(Chelsea 2004-2007)

Arjen Robben dhe këmba e tij e majtë e pandalshme, u shndërrua në një prej anësorëve më të mirë në botë te Bayern Munichu. Por, më herët gjatë karrierës, ai kishte qenë pjesë e Chelseat dhe u kishte ndihmuar Bluve ta fitonin titullin e parë pas 50 vitesh. Në vitet në vijim, holandezi nuk kishte raporte të mira me Jose Mourinhon dhe u largua. Fillimisht te Real Madridi dhe pastaj në vitin 2009 iu bashkua bavarezëve, ku qëndroi për një dekadë dhe fitoi çdo trofe të mundshëm.

Romelu Lukaku

(Chelsea 2011-2014)

Lukaku është duke shkëlqyer që nga transferimi te Interi, porse te Chelsea kishte pasur shumë pak hapësira. Ai u transferua në Stamford Bridge në vitin 2011 nga Anderlechti, por luajti shumë pak dhe u huazua te West Bromwich Albioni dhe më pas te Evertoni. Në vitin 2017 nënshkroi për Manchester Unitedin, ku u nënvlerësua, ndërsa shkëlqimi i tij erdhi te Nerazzurrët, ku po luan nga vitin 2019.

Nathan Ake

(Chelsea 2011-2017)

Mbrojtësi holandez iu bashkua Akademisë së Chelseat nga Feyenoordi në vitin 2011 dhe një vit më pas u përfshi në skuadrën e parë. Por, luajti shumë pak dhe u huazua te Readingu, Ëatfordi dhe Bournemouthi, ku shkëlqeu. ‘Cherries’ arritën ta mbanin për tre vite, mirëpo nuk ia dolën ta ndalnin fuqinë financiare të klubeve të mëdha dhe këtë vit e bleu Manchester City, ku pritet që shkëlqimi i tij të jetë akoma më i madh.

Tiago Mendes

(Chelsea 2004-2005)

Tiago u shndërrua në një prej mesfushorëve më të mirë defensivë në botë, ndërsa Atletico Madridi e fitoi titullin e Spanjës në vitin 2014. Megjithatë, gjatë kohës sa ishte te Blutë, portugezi pati një sezon shumë indiferent. Mirëpo, te Los Rojiblancos kishte shkëlqyer nën urdhrat e Diego Simeonen. Para se të shkonte në La Liga, ai ka luajtur edhe për Juventusin dhe Lyonin.

/Telegrafi/