Policia në Sri Lanka thotë se ka arrestuar dy persona në lidhje me vdekjen e një vajze nëntëvjeçare e cila u rrah vazhdimisht gjatë një rituali që ata besonin se do të largonin “një shpirt të lig”.

Sipas Al Jazeera, përcjell Telegrafi, dy të dyshuarat – gruaja që kryente ekzorcizmin dhe nëna e vajzës – u paraqitën në gjykatë të hënën për të dëgjuar akuzat mbi vdekjen e nëntëvjeçare, që ndodhi në Delgoda, një qytet i vogël rreth 40 kilometra në veri-lindje të kryeqytetit, Colombo.

Gjykata vendosi që të dyshuarat të mbahen të arrestuara deri më 12 mars.

Sipas zëdhënësit të policisë, Ajith Rohana, nëna besonte se vajza e saj ishte pushtuar nga një demon dhe e çoi atë në shtëpinë e ekzorcistes në mënyrë që të kryhej një ritual për ta larguar “shpirtin”.

Rohana tha se ekzorcistja së pari i vendosi vaj nëntëvjeçares dhe pastaj filloi ta godiste atë vazhdimisht me një shkop.

Kur vajza humbi ndjenjat, ajo u dërgua në një spital ku edhe vdiq.

Gruaja që kreu ritualin ishte e njohur në zonë për ofrimin e shërbimeve të tilla në muajt e fundit dhe policia po heton nëse edhe dikush tjetër ishte abuzuar. /Telegrafi/