Në Pejë dënohen pronarët e kompanive të transportit si dhe qytetarët që nuk respektuan masat kundër COVID-19

Njësia Rajonale e Komunikacionit Rrugor në Pejë, që nga e hëna ka filluar zbatimin e planit për shtimin e masave në kontrollin e transportit publik, për të parë nëse po zbatohet Ligji kundër pandemisë COVID-19.

Policia gjatë ditës së parë të këtij aksioni ka lëshuar shtatë gjoba për pronarët e kompanive të transportit publik në Pejë, njëkohësisht janë lëshuar edhe fletë gjoba për udhëtarë që nuk kanë respektuar Ligjin anti-COVID, gjegjësisht për mosbartjen e maskave.

“Ky aktivitet policor është marr me fillimin e fazës së dytë të procesit mësimor të vitit shkollor 2020/21, ku kemi edhe rritje të numrit të udhëtarëve dhe të nxënësve që shfrytëzojnë mjetet e transportit publik. Kështu që më datë 21.09.2020 në orët e mëngjesit është filluar me aktivitetin policor, duke bërë kontrollin detal të të gjitha subjekteve që ofrojnë transport publik (autobus, kombi-bus, si dhe taksive), e që sipas vendimeve të Qeverisë obligohen të punojnë me kapacitet të përgjysmuar sa i përket numrit të udhëtarëve që bartin për të lejuar hapësirën e nevojshme për çdo qytetar”, thuhet në njoftim.

Më tej bëhet e ditur se Policia e Kosovës në Rajonin e Pejës, gjegjësisht Njësia e Komunikacionit Rrugor në implementim të këtij plani gjatë ditës së parë të aktivitetit, ka lëshuar shtatë fletë gjoba për pronarët e kompanive të transportit publik në Pejë, njëkohësisht janë lëshuar edhe fletë gjoba për udhëtarë që nuk kanë respektuar ligjin anti-COVID, për mos bartjen e maskave.

Në njoftim thuhet se kontrolle të tilla do të vazhdojnë edhe ditëve në vijim. /Telegrafi/