Ndryshimi i motit në Evropë shkaktoi vështirësi dhe ndërprerje të udhëtimeve – dhe jo vetëm kaq

Disa pjesë të Evropës janë mbuluar me borën – në disa raste për herë të parë këtë vit – ndërkohë që kjo ka shkaktuar vështirësi dhe ndërprerje të udhëtimeve.

Mbretëria e Bashkuar

Një shtresë bore ka mbuluar Londrën dhe pjesë të Mbretërisë së Bashkuar duke shkaktuar ndërprerje të mëdha të udhëtimit në rrugë dhe në aeroporte – me më shumë se 300 anulime fluturimesh.

Sipas mediave të huaja, përcjell Telegrafi, temperaturat kanë rënë në minus dhjetë gradë Celsius në disa zona ditët e fundit.

Ka “alarme të verdha” për borë, mjegull dhe ngrica në disa zona duke përfshirë juglindjen dhe jugperëndimin e Anglisë dhe veriun e Skocisë.

Polonia

Bora ka rënë edhe në Poloni duke shkaktuar vonesa dhe ndërprerje në transportin publik.

Meteorologët thonë se vendi do të jetë “i mbërthyer” me kushtet e ngrirjes pasi temperaturat do të zbresin në minus 10 deri në 15 gradë Celsius, duke arritur ndoshta në minus 20.

Estonia

Periudha e ftohtë në Estoni bëri që të hënën pasdite kishte më shumë se dhjetë mijë shtëpi pa energji elektrike.

Fluturimet u anuluan, trenat u vonuan dhe tragetet u ndërprenë nga erërat e forta.

Bosnje-Hercegovina dhe Kroacia

Ndërkohë në zonën veriperëndimore të Bosnje-Hercegovinës dhe gjithashtu në Kroaci reshjet e dendura të shiut gjatë fundjavës shkaktuan vërshimin e lumenjve, të cilët përmbytën dhjetëra shtëpi.

Një trup u zbulua në Bosnje Hercegovinë pasi një rrëshqitje dheu “groposi” një pjesë të një rruge. /Telegrafi/