Nderohen me mirënjohje personat që dhanë kontribut në themelimin dhe zhvillimin e UP-së

Në 50 vjetorin e themelimit të Universitetit të Prishtinës “Hasan Prishtina”, sot janë nderuar me mirënjohje 50 persona, dekanë, profesorë, studentët që kanë kontribuar ndër vite për UP-në.

Rektori i UP-së, Marjan Demaj, tha se me mirënjohje do të nderohen të gjithë ata që në kohë të ndryshme kontribuuan për UP-në.

“UP po feston 50 vjetorin e themelimit të tij, për të gëzuar këtë ditë e këtë liri dikush dikur vuajti shumë, dikush është sot këtu e të tjerët fatkeqësisht nuk janë më në mesin tonë. Por, ne të gjitha së bashku i dimë se kush janë ata, ata dhe ju jeni heronjtë e vërtetë të këtij vendi, ata dhe ju jeni heronjtë e dijes, dritës dhe lirisë sonë. Sakrifica dhe vetëflijimi janë vlerat e popullit tonë, të cilat i përjetuam, i ri-përjetuam disa herë gjatë historisë. Ky virtyt u trashëgua me shekuj në kombin tonë dhe doli në pah edhe atëherë kur studentët e profesorët e UP-së me aktivitetet që ndërmorën lanë anash privilegjet e jetës studentore dhe asaj akademike, duke përqafuar frymën e interesit të përgjithshëm, çmim të cilin e paguan shumë me rrahje, burgosje e edhe vrasje”, tha Dema.

Rektori Dema tha se kushdo që e do vendin e do edhe Universitetin e Prishtinës, sepse sipas tij UP-ja e bëri këtë shtet, raporton KP.

“Kushdo që e do vendin e do edhe UP-në, sepse UP-ja e bëri këtë shtet. Ai i dha dritë këtij vendi në periudhat më të errëta, ai ngriti zërin atëherë kur menduam që nuk kemi zë. Ky tempull është jo vetëm tempull i dijes, por është tempull i shpresës së këtij vendi, është tempulli i paqes dhe i pavarësisë. Ky tempull gjatë ekzistencës së vet gjysmëshekullor bëri shumë në përhapjen e rrezeve të dijes, edukimit, shkencës, punës artistike në të gjitha hapësirat etnike shqiptare të ish-Jugosllavisë, por ka plot edhe të tjerë të cilët këto rreze i shpërndajnë kudo nëpër botë, në Evropë, Azi, Amerikë, Australi. Por, UP-ja si institucion madhështor i arsimit, i shkencës dhe i kulturës në vend, nuk do të ishte i tillë pa kontributin e pashembullt të personave që ndërtuan historinë e këtij institucioni”, tha Dema.

Ai tha se UP nuk do të mbijetonte pa guximin dhe këmbënguljen e profesorëve që në atë kohë ligjëruan nëpër shtëpi-shkolla, për të cilat tha se për një kohë zëvendësuan sallat e fakulteteve. E një gjë e tillë rektori Dema tha se nuk do të ishte e mundur pa dëshirën e kryefamiljarëve që më lëshimin e shtëpive për mësim rrezikuan ekzistencën e tyre, por që tha se qëllimi ishte arsimimi i të rinjve të vendit.

Me mirënjohje me motivacionin për arritje shkencore është nderuar edhe profesoresha Drita Statovci, e cila tha se ky vlerësim do të thotë njohje e punës që ka bërë për vite me radhë në UP.

“Në rend të parë do të thotë njohje e punës dhe në rend të dytë do të thotë gëzim se po krijojmë traditë. Do të thotë ka kush të vlerëson, ka për kënd vlerëson dhe kujt i jep mirënjohje dhe kjo është e arritur ma merr mendja për gjithë Universitetin dhe jo personalisht për mua”, tha ajo.

Ky aktivitet është organizuar në kuadër të “Javës së Universitetit”, për të shënuar 50 vjetorin e themelimit të Universitetit të Prishtinës “ Hasan Prishtina”.