NASA me teknologji speciale për ta ndihmuar Turqinë në gjetjen e njerëzve të bllokuar nën gërmadha

NASA do të ndihmojë Turqinë në gjetjen e të mbijetuarve nga rrënojat përmes teknologjisë FINDER, duke konfirmuar se grupeve në Turqi iu janë nisur këto njësi.

Pajisja FINDER, apo Gjetja e Individëve për Reagim ndaj Fatkeqësive dhe Urgjencës, u zhvillua nga një ekip nga Laboratori Jet Propulsion i NASA-s në Kaliforni pas tërmetit shkatërrues të vitit 2010 në Haiti dhe më vonë u komercializua nga SpecOps Group me bazë në Florida, transmeton Telegrafi.

Pajisjet përdorin sensorët e radarëve të valës elektromagnetike për të gjetur të mbijetuarit nën rrënoja, ose në ortekë duke zbuluar nga distanca rrahjet e zemrës të njerëzve gjithashtu edhe frymëmarrjet e tyre.

Deri tani numri i viktimave nga tërmeti shkatërrues në Turqi dhe Siri ka shkuar në mbi 45 mijë.

Goditjet ndodhën afër qytetit të Gaziantep, që është shtëpia e rreth 2 milionë njerëzve.

Turqia hasi në vështirësi për t’u përballur me katastrofën pasi ekipet e kërkim-shpëtimit nuk arritën në një zonë të goditur nga tërmeti për disa ditë, duke lënë njerëz të bllokuar nën rrënoja.

Kjo teknologji e NASA-s mund të zbulojë rrahjet e zemrës së një personi edhe nëse ata janë të mbuluar nën një grumbull të madh rrënojash.

NASA gjithashtu ndihmoi Turqinë duke ndarë pamjet e saj ajrore dhe të dhënat nga hapësira në mënyra që mund të ndihmojnë punonjësit e ndihmës dhe rimëkëmbjes në rajonin e goditur nga tërmeti, si dhe të përmirësojnë aftësinë e saj për të modeluar dhe parashikuar ngjarje të tilla.

“Angazhimet e NASA-s janë me ata të prekur nga tërmetet në Turqi dhe Siri”, tha administratori i NASA-s Bill Nelson në një deklaratë javën e kaluar. “NASA janë sytë tanë në qiell dhe ekipet tona të ekspertëve po punojnë shumë për të ofruar informacion të vlefshëm nga flota jonë vëzhguese e Tokës për reaguesit e parë në terren”.

Si funksionon kjo pajisje

FINDER funksionon duke përdorur radarin me valë elektromagnetike për të zbuluar lëvizjet e vogla të trupit të shkaktuara nga proceset e lindura të gjallesave, të tilla si rrahjet e zemrës ose frymëmarrja. Ndërsa këto lëvizje të vogla janë të vështira për t’u parë me syrin e njeriut, gjatësitë e valëve të përdorura nga radarët me valë elektromagnetike mund të depërtojnë thellë nëpër mori të rrënojave.

“Trupi juaj lëviz një milimetër kur zemra juaj rreh. Për shkak se vetë rrënojat nuk lëvizin, ne mund t’i ndajmë ato lëvizje. Më pas, ne shikojmë nëse lëvizja tregon rrahje zemre dhe frymëmarrje”, tha Jim Lux, i cili ishte menaxher i detyrave në prototipet FINDER.

FINDER mund të dallojë lëvizjet e njerëzve dhe të makinerive, madje edhe midis njerëzve dhe kafshëve – një dallim i rëndësishëm në mjedisin e kërkim-shpëtimit me ritme të shpejta.

Sa persona kanë vdekur në Turqi nga tërmeti?

Numri i të vdekurve në Turqi tani është 39,672, duke e bërë atë fatkeqësinë më të keqe në historinë moderne turke.

Por ky numër pritet të rritet duke qenë se rreth 264,000 apartamente u shembën nga tërmeti dhe shumë njerëz janë ende të zhdukur.

Në Sirinë fqinje, tashmë të shkatërruar nga më shumë se një dekadë e luftës civile, autoritetet kanë raportuar më shumë se 5,800 vdekje. Shifra nuk ka ndryshuar prej ditësh.

Pjesa më e madhe e viktimave të Sirisë kanë qenë në veriperëndim, një zonë e kontrolluar nga kryengritësit që janë në luftë me presidentin Bashar al-Assad – një konflikt që ka komplikuar përpjekjet për të ndihmuar njerëzit e prekur nga tërmeti.

As Turqia dhe as Siria nuk kanë thënë se sa njerëz janë ende të zhdukur pas tërmetit. /Telegrafi/