Mustafa: Projektbuxheti i vitit 2023 nuk reflekton karakter zhvillimor për vendin

Koordinatori i Departamentit për Financa në Kabinetin për Qeverisje të Mirë të Partisë Demokratike të Kosovës (PDK), Arben Mustafa ka thënë se Projektbuxheti i vitit 2023 nuk reflekton karakter zhvillimor për vendin.

Mustafa me anë të një konference për medie është shprehur se Qeveria e Kosovës ka mungesë të vizionit në hartimin e këtij buxheti.

“Ky Projektbuxhet në asnjë mënyrë nuk tregon se si qeveria e vendit do t’i përgjigjet sfidave të reja në ekonomi, por pasqyron një vazhdimësi të vitit aktual, vit ky kur qytetarët janë varfëruar, ndërsa rritja ekonomike kishte ngadalësim drastik”, theksoi Mustafa, shkruan Telegrafi.

Sipas tij, buxheti i 2023-së është i bazuar kryesisht në shpenzime dhe nuk krijon kushte për zhvillim ekonomik.

“Projektbuxheti i propozuar në asnjë mënyrë nuk reflekton një strategji të karakterit zhvillimor, por kryesisht është i bazuar në shpenzime sot për sot që nuk krijojnë kushte për zhvillim ekonomik afatgjatë”, tha ai.

Në fund, Mustafa është shprehur se Qeveri Kurti do të mbahet mend për shpenzimet e pa menduar mirë.

“Kjo qeveri nuk po mund të del me një vizion konkret që tregon se ku do ta dërgoj vendin në vitet e mbetura të mandatit. Nga ajo që po shihet, kjo qeveri do të mbahet mend për shpenzime enorme të pa menduara mirë që nuk lënë gjurmë në rritjen afatgjate”, përfundoi Mustafa. /Telegrafi/