Muslera i del në mbrojtje Strakoshës pas gabimit: Edhe unë gabova disa ndeshje më parë, janë gjëra që ndodhin

Thomas Strakosha ka bërë një gabim të rëndë në ndeshjen mes Galatasarayt dhe Lazios në kuadër të Ligës së Evropës.

Portieri shqiptar e futi gabimisht topin në rrjetën e tij për t’i dhuruar Galatasarayt tri pikët e para në grupet e Ligës së Evropës.

Strakosha ishte i shkatërruar me gabimin e bërë, por pas ndeshjes në mbrojtje të tij ka dal homologu i skuadrës turke, Fernando Muslera.

Kapiteni i Galatasarayt ka thënë se disa ndeshje më parë ka bërë një gabim të tillë dhe se këto gjëra ndodhin në futboll.

“Të kthejmë kokën pak mbrapa, ishte faji im disa ndeshje më parë. Gjëra të tilla mund të ndodhin gjithmonë”, tha Muslera.

“Unë kam diçka për të thënë, portierët janë vetëm në fushë. Do të ketë gabime si ai i Strakoshës sot. Kjo është çudia e punës së portierit. Gabimi ynë nuk falet”.

“Kjo është gjithashtu pjesë e punës sonë, por ne duhet të vazhdojmë pa u demoralizuar, nuk duhet të heqësh dorë”, ka thënë Muslera në një mesazh mbështetje për portierin shqiptar.

Lexo po ashtu Strakosha shënon një autogol të pabesueshëm, menjëherë bëhet viral në rrjetet sociale

Gafa e Strakoshës është bërë virale në rrjetet sociale, por portieri shqiptar ndihej shumë keq me gabimin e bërë që i kushtoi skuadrës së tij me humbje 1-0 në Stamboll. /Telegrafi/