Ministria e Punëve të Brendshme javë më parë është përballur me disa sulme kibernetike të përmasave të vogla, por së fundmi ky institucion është përballur me një sulm kibernetik të llojit “Phishing”, e që është i përmasave të mëdha.

Sulmi “Phishing” kishte ndodhur më 26 shkurt të këtij viti, por që i njëjti nuk ka arritur të shkaktoj dëme në të dhëna apo informacione.

Një gjë e tillë është konfirmuar për Telegrafin nga vetë Ministria e Punëve të Brendshme.

“Institucionet e Kosovës në mënyrë të vazhdueshme janë të atakuara nga sulmet kibernetike kryesisht të llojit ‘Phishing’ por të përmasave të vogla. Ndërsa më datën 26-02-2022 ka ndodhur një sulm kibernetik i llojit ‘Phishing’ me përmasa më të mëdha, por që edhe ky sulm kibernetik nuk ka bllokuar apo dëmtuar informacione apo të dhëna”, thuhet në përgjigjen e MPB-së.

“Phishing” është një sulm që përpiqet të vjedhë paratë ose identitetin tuaj duke ju bërë të zbuloni informacione personale – të tilla si numrat e kartave të kreditit, informacionet bankare ose fjalëkalimet – në faqet e internetit që janë legjitime.

Mashtruesit kibernetikë janë zakonisht kompani, miq ose të njohur të besuar në një mesazh të rremë që përmban një lidhje me një faqe interneti “phishing”.

Qeveria e Kosovës vitin e kaluar kishte marr vendim për ngritjen e kapaciteteve për mbrojte  nga sulmet kibernetike nëpër institucione.

“Qeveria e Kosovës ka miratuar vendimin me të cilin ka obliguar të gjitha institucionet publike në Republikën e Kosovës që të bashkërendojnë aktivitetet e tyre me Agjencinë e Shoqërisë së Informacionit në Ministrinë e Punëve të Brendshme (ASHI/MPB), për zhvillimin e sistemeve elektronike dhe integrimin e tyre në infrastrukturën dhe platformat qendrore të sistemeve të informacionit në pajtim me legjislacionin në fuqi”, thuhej në njoftim.

Me këtë rast, ishte obliguar ASHI/MPB të paraqesë për miratim në Qeveri draftin e Strategjisë së Qeverisjes Elektronike brenda tre (3) muajve si dhe Policia e Kosovës që të rrisë kapacitetet hetuese për parandalimin e sulmeve kibernetike në bashkëpunim me institucionet relevante vendore dhe ndërkombëtare /Telegrafi/