Molliqaj paralajmëron vazhdimin e protestave kundër shtrenjtimit të rrymës – nuk flet për shuplakën që ia dha policit

Kryetari i PSD-së, Dardan Molliqaj ka folur një ditë pas protestës kundër shtrenjtimit të rrymës.

Molliqaj përmes një postimi në Facebook, ka kërkuar të dëgjohet vullneti i qytetarëve dhe të kthehet prapa propozimi i Zyrës së Rregullatorit për Energji për ndryshimin e tarifave.

Ai ka paralajmëruar se protestat dhe aksionet do të vazhdojnë derisa të plotësohen këto kërkesa.

Lexo po ashtu Protesta para Qeverisë, momenti kur Molliqaj godet shuplakë policin

Molliqaj nuk ka dhënë asnjë koment lidhur me videon e publikuar ku shihet teksa i bie me shuplakë njërit prej pjesëtarëve të Policisë së Kosovës.

Postimi i plotë i Molliqajt:

Të dëgjohet vullneti i qytetarëve, të kthehet mbrapsht propozimi për shtrenjtim të rrymës

Pabarazia socio-ekonomike në Kosovë është shumë e thellë. Çmimet, përfshirë edhe ato të produkteve bazike ushqimore e higjienike janë rritur shumë tashmë. Familjet që i përkasin shtresës së varfër dhe asaj të ulët me vështirësi ia dalin në fund të muajit.

Në këtë situatë, propozimi për shtrenjtim të energjisë elektrike është absolutisht i papranueshëm dhe në kundërshtim të plotë me nevojat e qytetarëve të Kosovës.

Ky propozim, i cili është në diskutim publik deri nesër, u kundërshtua fuqishëm nga qytetarët e vendit. Prandaj, kërkojmë nga ZRRE që nesër të mos e aprovojë propozimin në fjalë e ta dëgjojë zërin e qytetarëve. Në të kundërtën, aksionet e protestat do të vazhdojnë deri sa ky vendim të kthehet prapa. /Telegrafi/