Ministria ruse e Punëve të Jashtme postoi një video në Twitter që dyshohet se tregon ushtarët ukrainas duke ndaluar një veturë që kalonte me civilë, më pas duke i fyer ata, frikësuar fëmijën në veturë dhe duke hapur zjarr paralajmërues.
Përbri videos së postuar, ministria ruse e Punëve të Jashtme shtoi një koment: “nazistët do të jenë gjithmonë nazistë”. Kur u zbulua se pamjet ishin të inskenuara, ‘tweet-i’ u fshi pa koment, transmeton Telegrafi.
Në video shihet një veturë ushtarake që parakalon një veturë civile, dhe e detyron atë të ndalojë. Dy ushtarë më pas dalin nga vetura.
Njëri prej tyre i afrohet veturës civile dhe fillon të ofendojë shoferin me fëmijën. Ai frikëson gruan, fëmija qan, ushtari më pas del nga vetura dhe hap zjarr paralajmërues.
"Një herë hajdutë, përgjithmonë hajdut. Ky është terrori në të cilin jetojnë ukrainasit. Ushtari e quajti gruan derr vetëm sepse ajo fliste rusisht", tha ministria ruse në një koment.
Megjithatë, vetë video ka disa lëshime. Platforma kërkimore GeoConfirmed, konfirmoi se videoja është xhiruar në rajonin e Donetskut dhe 30 kilometra nga linja më e afërt.
Kjo do të thotë, në vendet e kontrolluara aktualisht nga rusët. Ukrainasit nuk mund të jenë në videon e publikuar.
Ka devijime të tjera. Sipas Unian, rezultoi se vetura ushtarake ishte në të vërtetë ruse. Nuk u shkon as shiriti i verdhë që ushtarët mbajnë në krahë. Ukrainasit nuk e përdorin këtë ngjyrë për disa muaj.
Përveç kësaj, gjithçka është regjistruar nga kamera në veturë. Por Ukraina e ndaloi përdorimin e tyre menjëherë pas fillimit të luftës, në mënyrë që të mos zbulohen pozicionet e ushtrisë nga rusët.
Pasi kuptuan se videoja ishte e falsifikuar, Ministria e Jashtme ruse e fshiu postimin në Twitter pa dhënë ndonjë shpjegim.
Megjithatë, një regjistrim i videos së riprodhuar është aktualisht i disponueshëm, për shembull, në llogarinë e ambasadës ruse në Britani. /Telegrafi/
