0Shares

Ministri i Zhvillimit Ekonomik (MZHE), Valdrin Lluka po merr pjesë në forumin e parë me temë “Perspektiva e Investimeve: Ballkani Perëndimor”, si pjesë e takimeve të Samitit të Bashkimit Evropian për Ballkanin Perëndimor në Sofje të Bullgarisë.

“Kosova, duke qenë në mes të vendeve të Ballkanit Perëndimor, ka luajtur rol kryesor në lidhjen në mes vendeve. Investimet në infrastrukturë rrugore, hekurudhore dhe tash në telekomunikacion që Kosova ka realizuar dhe është duke realizuar, e bëjnë rajonin më të ndërlidhur dhe më atraktiv për investime të huaja”, ka thënë Lluka, përcjell Telegrafi.

Gjithashtu, Lluka para shumë bizneseve të huaja që ishin prezent, ka prezantuar mundësitë që Kosova ofron në sektorë të ndryshëm, me fokus në energji, miniera dhe teknologji informative.

Kreu i MZHE-së ka vlerësuar se integrimi i një tregu të përbashkët energjetik mbetet sfida kryesore në vend.

Samiti i Sofjes mbledh krerët e shteteve apo qeverive të vendeve anëtare të Bashkimit Evropian dhe homologët e tyre nga regjioni i Ballkani Perëndimor.

Temë qendrore e samitit do të jetë ‘Konektiviteti’ nga aspekti i transportit, energjisë, infrastrukturës dixhitale dhe edukimit. /Telegrafi/

Të Ngjajshme
Shfaq Komentet (0)