Michelin, prodhuesi francez i gomave i shet aksionet e saj në Rusi

Prodhuesi francez i gomave, Michelin, të premten deklaroi se ka shitur aksionet në kompanitë e saj në Rusi tek Power International Tyres, një distributor i gomave në këtë vend. Michelin Group nuk ka zbuluar asnjë detaj mbi çmimin e shitjeve.

Marrëveshja, e cila u aprovua nga autoritetet lokale, do të mbajë të hapura 250 vende pune, shumica e e tyre në fabrikën e vetme ruse të Michelin në Davydovo, bënë të ditur nga grupi.

Fabrika në Davydovo, e cila ndodhet afër Moskës, ka të punësuar 750 njerëz. Prodhon deri në 2 milionë goma në vit, kryesisht për veturat e pasagjerëve për tregun rus e gjithashtu edhe për disa nga tregjet e pjesës veriore të Evropës, raporton Reuters, transmeton Telegrafi.

Michelin tha se ishte e pamundur që çdo punonjës të transferohej në Power International Tyres dhe kështu ata që dëshironin të largoheshin nga kompania do të lejoheshin ta bënin këtë “në kushte të favorshme”.

Kompania franceze ishte e pranishme në Rusi që nga viti 1997 dhe u bë kompania e parë ndërkombëtare e gomave që hapi fabrikën e saj të prodhimit atje në 2004.

Vitin e kaluar ajo njoftoi se po pezullonte aktivitetin industrial në Rusi dhe eksportet në vend për shkak të vështirësive të zinxhirit të furnizimit pas pushtimit të Ukrainës nga Moska. Pas njoftimit, Michelin tha se shitjet në Rusi përfaqësojnë 2 për qind të totalit të grupit dhe 1 për qind të prodhimit global të gomave të makinave.

Industria e gomave është goditur rëndë nga sanksionet perëndimore ndaj Rusisë, të cilat kanë ndërprerë furnizimet e lëndëve të para kyçe dhe kanë mbyllur fabrikat që furnizojnë klientët jashtë Rusisë.

Michelin në prill kishte deklaruar se ndërprerja e aktiviteteve të saj në Rusi çoi në një rënie prej 25 për qind të vëllimeve në tremujorin e parë të këtij viti. /Telegrafi/