Mesazh i qartë nga SHBA për Izraelin: Armëpushim të menjëhershëm në Gaza dhe më shumë ndihma – pa justifikime

Zëvendëspresidentja e SHBA-së, Kamala Harris ka thënë se duhet të ketë një “armëpushim të menjëhershëm” në Gaza, pasi ajo i bëri thirrje qeverisë izraelite të bëjë më shumë për lejuar rrjedhën e ndihmës, “pa justifikime”.

Zonja Harris tha se një armëpushim gjashtë-javor do të nxirrte pengjet dhe do të krijonte mundësinë për një sasi të konsiderueshme ndihme në territorin palestinez të shkatërruar nga lufta, shkruajnë mediat e huaja, përcjell Telegrafi.

Ajo tha gjithashtu se ka një “marrëveshje në tryezë” dhe Hamasi “duhet të pajtohet me këtë”.

Deklarata e saj vjen teksa po shpresohet që një marrëveshje të arrihet përpara fillimit të Ramazanit.

Lexo po ashtu Pas 10 vitesh përpjekje, një grua palestineze mbeti shtatzënë dhe lindi binjakë - një sulm izraelit ia vrau të dy

SHBA kishte thënë se një marrëveshje tashmë është “pranuar pak a shumë” nga Izraeli dhe është në pritje të miratimit nga militantët e Hamasit.

Por pas mbërritjes së delegacionit të Hamasit, një zyrtar palestinez tha se marrëveshja “nuk ishte arritur ende”, dhe nga pala izraelite kishte dyshime nëse delegacioni i saj do të merrte pjesë edhe në raundin e fundit të bisedimeve.

Zyrtarët izraelitë thuhet se bojkotuan negociatat në Kajro të dielën pasi Hamasi refuzoi kërkesën e tyre për një listë të plotë me emrat e pengjeve që janë ende gjallë.

Hamasi thuhet gjithashtu se dëshiron që një armëpushim i përhershëm të jetë pjesë e çdo marrëveshjeje. /Telegrafi/