Mediat zvicerane ngrenë alarmin: Rreth 600,000 automjete po qarkullojnë në rrugët e vendit pa u kontrolluar

Mijëra makina po qarkullojnë nëpër Zvicër pa u kontrolluar – ato duhej të ishin kontrolluar shumë kohë më parë. Pse autoritetet e trafikut rrugor po mbeten prapa?

Kjo është çështja që kanë shtruar së fundmi mediat zvicerane, sipas të cilave, makinat duhet të inspektohen rregullisht nga zyra e trafikut kantonal, përcjell Telegrafi.

Siç bëhet e ditur, makinat e reja duhet të inspektohen për herë të parë pas pesë vjetësh dhe pastaj çdo dy deri në tre vjet.

Por në shumë vende në Zvicër, autoritetet e trafikut rrugor po mbeten prapa.

Si pasojë, shkruan Blick.ch, përcjell Telegrafi, aktualisht ka mbi 600,000 makina në rrugë në të gjithë vendin që duhet të ishin kontrolluar një vit më parë, duke u bazuar në një hulumtim të Radio SRF.

“Prandaj, shumë autoritete kantonale të trafikut rrugor nuk mund të përballojnë më inspektimet e kërkuara. Numri i automjeteve të painspektuara është veçanërisht i madh në kantonin e Bernës, ku numri i automjeteve të painspektuara është pothuajse trefishuar në dy vitet e fundit”, shkruan mediumi zviceran.

Dhe sipas tij, arsyet janë: numri i automjeteve që po rritet vazhdimisht, tregtia e makinave të përdorura që po lulëzon dhe pandemia e coronavirusit që gjithashtu ka lënë gjurmët e saj – gjatë izolimit, shumë inspektime u desh të pezulloheshin dhe të riplanifikoheshin më vonë.

Megjithatë, autoritetet nuk shohin ndonjë problem sigurie.

Sipas tyre, meqenëse stafi është i pakët, automjeteve po u jepet përparësi “bazuar në rrezik”.

Sipas raportit të SRF-së, automjetet komerciale si taksitë ose kamionët po inspektohen sa më shpejt të jetë e mundur, ndërsa makinat private inspektohen më vonë.

Pavarësisht ngarkesës së punëve të prapambetura, Zyra Federale e Rrugëve (Astra) aktualisht nuk sheh ndonjë problem akut sigurie: vetëm rreth një përqind e aksidenteve janë për shkak të defekteve teknike, i tha ajo SRF-së.

Sidoqoftë, shoqata e tregtisë së automobilave AGVS paralajmëron për rreziqe në rritje sepse mosha mesatare e automjeteve në Zvicër po rritet.

Sipas autoriteteve, përgjegjësia për gjendjen e një makine mbetet ende qartësisht e pronarëve. /Telegrafi/