Mbahet takimi i Bordit për menaxhim të integruar të kufirit

Në Ministrinë e Punëve të Brendshme u mbajt takimi i Bordit për Menaxhimin e Integruar, ndërsa u tha se në të ardhmen duhet të krijohen programe të avancuara për kontroll të kufirit  si formë e avancuar e teknologjisë në mënyrë që trupat e kontrollit fizik të orientohen në angazhime tjetra.

Në këtë takim morën pjesë, ministri i Punëve të Brendshme, Flamur Sefaj, zëvendësministrat, Isa Xhemajlaj, Milan Radjoevic, drejtori i Doganës së Kosovës, Bahri Berisha, drejtori për Kufi i Policisë së Kosovës, Shaban Guda dhe përfaqësues tjerë të agjencive dhe partnerëve ndërkombëtarë.

Me këtë rast ministri Sefaj tha se do ta kenë përkrahjen e tij sa i  përket shtyrjes së politikave në kuadër të menaxhimit të integruar të kufirit të cilat dalin nga strategjia kombëtare e MIK-ut.

“Të gjithë së bashku duhet të shikojmë që në të ardhmen të krijohen programe të avancuara në bazë të koncepteve bashkëkohore për kontroll të kufirit  si formë e avancuar e teknologjisë në mënyrë që të trupat e kontrollit fizik të orientohen në angazhime tjetra”, theksoi ministri Sefaj.

Në njoftim thuhet se njëra ndër pikat më të rëndësishme është vlerësimi i rolit të Qendrës Kombëtare për Menaxhimin e Integruar të Kufirit (QKMK) dhe për mënyrat  se si të zgjidhen modalitetet më të mira që ka ky koncept për ofrimin e sigurisë kufitare në Republikën e Kosovës.

Me këtë rast zëvendësministri, Isa Xhemajlaj theksoi se do të angazhohet konkretisht për të gjetur modalitetet më të mira sa i përket avancimit të rolit të QKMK-së, e cila ka një përgjegjësi të madhe në parandalimin e krimit në kufi dhe lehtësimin për qasje në të dhëna për agjencitë e zbatimit të ligjit. /Telegrafi/