Manaj pret në takim Shefin e Misionit të EULEX-it, flasin për procesin e ndriçimit të fatit të personave të zhdukur

Kryesuesi i Komisionit Qeveritar për Persona të Zhdukur, Ramë Manaj priti në takim Shefin e EULEX-it , Lars – Gunnar Wigermark, me të cilin diskutoi për bashkëpunimin mes tyre në lidhje me mundësitë e bashkëpunimit të mëtejmë, si dhe për regjistrin qendror të personave të zhdukur dhe bashkëpunimin me Serbinë në lidhje me çështjen e personave të pagjetur.

Kështu u bë e ditur përmes një komunikate për medie, kur po ashtu thuhet se Wigermark tha se do të vazhdohet me përkrahjen dhe bashkëpunimin e mëtejmë me Komisionin Qeveritar për Persona të Zhdukur.

“Gjatë takimit, krahas diskutimit dhe vlerësimit të bashkëpunimit të deritanishëm, u diskutua edhe për mundësitë e bashkëpunimit të mëtejmë, si dhe për regjistrin qendror të personave të zhdukur dhe bashkëpunimin me Serbinë në lidhje me çështjen e personave të pagjetur. Kryesuesi i Komisionit, krahas vlerësimit dhe shprehjes së mirënjohjes për bashkëpunimin dhe angazhimin e deritanishëm në procesin e ndriçimit të fatit të personave të zhdukur, shprehi  gatishmërinë edhe për vazhdim të bashkëpunimit të mëtejmë në përpjekjen për zbulimin e fatit të personave të pagjetur”, thuhet në komunikatë.

Kryesuesi i Komisionit Qeveritar për Persona të Zhdukur, Ramë Manaj, gjatë këtij takimi ishte i shoqëruar edhe nga Kryetari i Delegacionit të Kosovës për bisedime me Serbinë për çështjen e personave të zhdukur, Ibrahim Makolli dhe Udhëheqësi i Njësisë së Komisionit, Kushtrim Gara.

Kurse, Shefi i EULEX-it , Lars – Gunnar Wigermark, ishte i shoqëruar edhe nga zyrtarët e EULEX-it, Daniele Pancheri dhe Melinda Bytyqi. /Telegrafi/