Kuvendi i Komunës së Gjilanit ka miratuar vendimin e Drejtorisë për Shëndetësi dhe Mirëqenie Sociale për subvencionimin e punësimit të personave me aftësi të kufizuara.

Drejtoresha e këtij drejtorati, Mimoza Kadriu Qerimi, ka bërë të ditur se vendimi është miratuar unanimisht, me mbështetjen e kryetarit të Komunës së Gjilanit, Alban Hyseni.

“Me mbështetjen e kryetarit të Komunës së Gjilanit, Alban Hyseni, Kuvendi i Komunës, miratoi unanimisht propozimin e Drejtorisë së Shëndetësisë dhe Mirëqenies Sociale për subvencionimin e punësimit të personave me aftësi të kufizuara”, ka deklaruar Kadriu Qerimi.

Ajo ka sqaruar se programi parasheh punësim njëvjeçar me gjysmë orari, përkatësisht katër orë në ditë, me synim rritjen e përfshirjes sociale dhe ekonomike, krijimin e mundësive të reja për punësim dhe mbështetjen e bizneseve lokale që punësojnë këtë kategori.

“Ky program parasheh punësim 1-vjeçar me gjysmë orari (4 orë), me qëllim krijimin e mundësive të reja për punësim, rritjen e përfshirjes sociale dhe ekonomike, si dhe mbështetjen e bizneseve lokale që punësojnë këtë kategori”, ka thënë ajo.

Sipas Kadriu Qerimit, ky program pritet të ketë ndikim të drejtpërdrejtë në uljen e papunësisë dhe në ndërtimin e një shoqërie më gjithëpërfshirëse.

Po ashtu, ajo ka paralajmëruar se së shpejti do të hapet edhe thirrja për aplikim.

“Ky është një hap shumë i rëndësishëm drejt përfshirjes, barazisë dhe mbështetjes konkrete për një jetë më dinjitoze dhe më të pavarur për të gjithë”, ka deklaruar drejtoresha Mimoza Kadriu Qerimi. /Telegrafi/

LajmeGjilaniLokale