Kuvendi kërkon të hetohen të gjithë anëtarët e bordeve të ndërmarrjeve publike për konflikt interesi

Anëtarët e Komisionit Parlamentar për Administratë Publike, Qeverisje Lokale dhe Media sot kanë kërkuar nga Agjencia Kundër Korrupsion dhe nga Këshilli i Pavarur Mbikëqyrës që të hetojë të gjitha bordet e agjencive të pavarura dhe të ndërmarrjeve publike në Kosovë që janë zgjedhur nga Kuvendi dhe nga Qeveria për konflikt interesi të anëtarëve të tyre.

Kryetari i këtij Komisioni Nait Hasani, ka thënë se ka anëtarë të bordeve që marrin nga tri paga për një muaj në mënyrë jo të ligjshme, dhe kjo sipas tij, duhet parandaluar.

“A kanë ose s’kanë, ata që kanë i qesim në kuvend. Ata që i kanë nga dy tri rroga me i sjellë emrat e tyre, sepse ka. Mirëpo, ka edhe anëtarë që nuk kanë konflikt interesi, por megjithatë ata që kanë konflikte interesi t’ju japim mundësi ta dimi publikisht, qeveria, kuvendi. Partitë politike gjithë kohën në fushatë kanë fol për vend të punës. Nëse një njeri është i aftë me qenë në të njëjtën kohë tetë orë me një punë dhe tetë me një punë tjetër i angazhuar me orare të njëjtë nuk ka mundësi me qenë në të dy vende. Kështu që ky është konflikt interesi”, ka thënë Hasani.

Deputetja e PDK-së Xhevahire Izmaku, ka thënë se të gjithë janë të thirrur si deputet që ta ruajnë buxhetin e Kosovës, dhe ka shtuar se nuk ka nevojë t’ia falin askujt shkeljet ligjore.

“Kemi dilema, sepse ka ende zyrtarë që janë shklesës të ligjit dhe s’kemi nevojë me ia falë askujt, kemi me qenë njësoj për krejt, jo për diko nënë e për diko njerkë”, ka theksuar Izmaku.

Milaim Zeka nga Nisma tha se janë edhe dy anëtarë të bordit që po shkelin ligjin dhe kanë konflikt interesi, edhe pse nuk i ka përmendur emrat.

“Kam has në leximet e mia që ka deputetë të Parlamentit të Kosovës që janë edhe anëtarë të bordeve. Kjo a është e lejueshme?”, ka pyetur Zeka.

Kjo kërkesë ka ardhur sipas Nait Hasanit, me arsyetimin se kuvendi ka filluar me një shkarkim nga pozita gjatë javës së kaluar, ku në seancën e kaluar të Kuvendit deputetët kanë shkarkuar Mimoza Pllana-Hasanin nga Bordi i RTK-së për shkak të konfliktit të interesit.

Në mbledhjen e Komisionit Parlamentar për Administratë Publike, Qeverisje Lokale dhe Media sot ka diskutuar edhe për projektligjin për kryeqytetin e Kosovës. Anëtarët më 11 dhjetor kanë caktuar dëgjim publik për Projektligjin për Prishtinën.

Në këtë mbledhje Komisioni ka proceduar në Qeveri edhe Projektligjin për Këshillin e Pavarur Mbikëqyrës për Shërbimin Civil të Kosovës. /KP/