Kryeziu: Haxhi Shala po mbahet në zyrat e EULEX-it, pritet që gjatë ditës të transferohet në Hagë

Ish-eprori i Ushtrisë Çlirimtare të Kosovës (UÇK), Haxhi Shala, i cili u ndalua të hënën nga Gjykata Speciale pritet që gjatë ditës të transferohet për në Hagë.

Kështu ka deklaruar për Telegrafin kryetari i OVL UÇK-së në Malishevë, Metush Kryeziu.

Lexo po ashtu Specialja aksion në Prishtinë, raportohet se Haxhi Shala po intervistohet

Ai ka thënë se Shala, i njohur si Komandant “Topi” aktualisht po mbahet në zyrat e misionit të Bashkimit Evropian për Sundim të Ligjit (EULEX).

“Haxhiu po mbahet në zyrat e EULEX-it dhe sipas disa burimeve, pritet që sot të tranferohet për në Hagë”, ka deklaruar Kryeziu.

Gjatë ditës së djeshme EULEX-i ishte në shtëpinë e Shalës por sipas kreut të OVL UÇK-së në Malishevë, nga aty nuk është marrë asgjë.

Ndërkohë Zyra e Prokurorit të Specializuar, me seli në Hagë, nuk ka dashur të komentojë këtë rast, por ka konfirmuar se janë duke u zhvilluar operacione në Kosovë.

“Zyra e Prokurorit të Specializuar është duke zhvilluar operacione të vazhdueshme në Kosovë dhe nuk ka komente të mëtejme”, kanë thënë nga kjo zyrë për Telegrafin.

Kujtojmë se gjatë këtij viti, Specialja ka kryer bastisje në Kosovë, disa prej tyre në pronat e ish-këshilltarëve të Thaçit.

ZPS ka deklaruar se do të hetojë dhe do të ndjekë penalisht të gjithë ata që i frikësojnë apo ndërhyjnë te dëshmitarët, ose “ofrojnë mbështetje financiare apo të ndonjë forme tjetër për vepra të tilla penale”. /Telegrafi/