Kryebashkiakët shqiptarë të rajonit me platformë bashkëpunimi

Kreu i Bashkisë së Tiranës, Erion Veliaj tha gjatë takimit me kryebashkiakët shqiptarë nga rajoni se në fund të takimit të tyre do të hartohet një platformë bashkëpunimi.

Sipas Veliajt, kjo platformë do të ketë 5 shtylla kryesore.

“E para, urbanistika. Në muajin dhjetor, Tirana do të miratojë planin urbanistik. Arritëm në një kohë rekord arritëm të krijojmë planin urbanistik. Jam në dijeni se plane të tilla po krijohen në Prishtinë, Tetovë, Ulqin dhe në Preshevë”, tha Veliaj.

“Mjedisi është një nga fushat ku Tirana po bën progres. Kultura dhe arti janë çështje që kemi diskutuar gjatë me kolegët. Çdo vepër që vihet në skenë, ka një kosto dhe shpesh herë ajo që ne bëjmë i shumëfishojmë këto kosto. Dje po diskutonim me Teutën (kryebashkiake e Tetovës) se sa mirë do të ishte të krijonim një kalendar unik. Inovacioni është një nga çështjet që po preket gjithnjë e më shumë sot. Çështja e fundit është ka të bëjë me mënyra inovative të financimit, siç është partneriteti publik-privat”, tha ai.

Lexo po ashtu Krijohet rrjeti i komunave shqiptare

Kryebashkiaku i Tiranës tha se qytetet shqiptare përballen me sfida të njëjta.

“Qytetet tona përballen me sfida shumë të ngjashme dhe sa herë vizitoj kolegët, kuptoj se thuajse identike i kemi sfidat tona. Sipërmarrja private, bizneset kanë qenë shumë më paraprijës se sa ne. Të marrim një shembull të thjeshtë, se si ky bashkëpunim na ndihmon të gjithëve. Në vitin 2016, Tirana ka buxhetin më të madh historik që ka pasur ndonjëherë, 120 milionë dollarë, por Tirana sot është 1200 km katror, ka mbi 980 mijë banor. Për ta vënë në kontekst me rajonin, Zagrebi me një popullsi thuajse të njëjtë ka një buxhet 1.1 miliardë euro, dhjetëfishin e Tiranës”, tha Veliaj.

Në takim po marrin pjesë kryebashkiakët-kryetarët e komunave nga Tirana, Prishtina, Tetova, Ulqini dhe Presheva.