Kontrabandë me alkool medicinal, policia arreston një person në Mitrovicën e Veriut

Është ndaluar një person në Mitrovicën e Veriut, kjo pasi i njëjti kishte tentuar të bëjë kontrabandë me alkool medicinal, njofton Policia e Kosovës.

Sipas policisë ky person është përcjellë nga policia dhe pastaj është dërguar në stacionin policorë në Mitrovicën e Jugut, derisa malli është referuar tek Dogana e Kosovës.

“Në vazhdën e aktiviteteve të shtuara për luftimin e kriminalitetit, me theks të veçantë kontrabandës në pjesën veriore të vendit, kanë vazhduar aktivitetet policore dhe të institucioneve tjera përgjegjëse. Kështu dje, në pjesën veriore është vërejtur një automjet me të cilin dyshohej se po kryhej kontrabandë me mall, me ç‘rast automjeti është përcjellë dhe më pas është ndaluar nga policia. Gjatë kontrollit të tij është vërejtur se është i ngarkuar me një sasi lëngu, që dyshohet të jetë alkool medicinal. Automjeti drejtohej nga një mashkull kosovar dhe i njëjti është sjellë në Stacionin Policor Mitrovicë Jugu. Rasti është trajtuar në koordinim me organet e drejtësisë dhe më pas është referuar për trajtim së bashku me mallin e konfiskuar tek Dogana e Kosovës”, thuhet në njoftimin e policisë./Telegrafi/