Kompania e Jeff Bezos fiton kontratën nga NASA për ndërtimin e anijes kozmike që do të çojë astronautët në Hënë

Një ekip i udhëhequr nga Blue Origin kompania në pronësi të Jeff Bezos fitoi një kontratë prej 3.4 miliardë dollarësh të NASA-s për të ndërtuar një anije kozmike që duhet të transportojë astronautët nga Toka në sipërfaqen e Hënës dhe anasjelltas, tha të premten agjencia hapësinore amerikane, një sukses i madh për kompaninë dy vjet pasi humbi në një konkurs tjetër me SpaceX të Elon Muskut.

Blue Origin planifikon të ndërtojë zbarkuesin e tij 16 metra të gjatë Blue Moon në partneritet me Lockheed Martin, Boeing Co, firmën e softuerit Draper dhe firmën robotike Astrobotic, transmeton Telegrafi.

NASA zgjodhi Blue Origin mbi një garë rivale të udhëhequr nga kontraktori i mbrojtjes në pronësi të Leidos Inc, Dynetics, që përfshinte gjithashtu Northrop Grumman.

Vendimi i NASA-s për ta zgjedhur Blue Origin do t’i japë kompanisë një mundësi të dytë për dërgimin e astronautëve në Hënë në kuadër të programit të saj Artemis.

NASA i dha kontratën SpaceX-it për 3 miliardë dollarë në vitin 2021 për të ndërtuar anijen e saj kozmike Starship për të zbarkuar astronautët në sipërfaqen hënore për herë të parë që nga misioni përfundimtar Apollo në vitin 1972. Dy misionet e para Starship janë planifikuar për më vonë këtë dekadë.

“E kam thënë edhe më parë: ne duam më shumë konkurrencë, duam dy zbarkues, dhe kjo është më mirë”, tha administratori i NASA-s Bill Nelson në një event kur njoftoi për kontratën në selinë e NASA-s. “Kjo do të thotë që ju keni besueshmëri, keni kopje rezervë”. /Telegrafi/