Klubi i Biznesit: Vendimi i Gjykatës Komerciale dëshmon të drejtën tonë

Klubi i Biznesit ka përshëndetur dhe mirëpritur vendimin e Dhomës së shkallës së dytë të Gjykatës Komerciale e cila e aprovon si të bazuar kërkesën për shtyrje të ekzekutimit të vendimit të Komisionit të Ankesave të Agjensionit për Regjistrimin e Bizneseve. 

Klubi i Biznesit thekson se kanë qenë të bindur në të drejtën e tyre dhe kjo është dëshmuar edhe nga gjykata.

“Në të njëjtën kohë shprehim shqetësimin tonë që në vend se të angazhohemi për të përmbushur misionin tonë, për të kontribuar në rritjen e ekonomisë kosovare, është dashur të merremi me çështje burokratike.

Klubi i Biznesit është i përkushtuar të jap kontributin e vet në ekonominë kosovare, duke ndërtuar ura bashkëpunimi me investitorë të jashtëm, por edhe duke u angazhuar në projekte të përbashkëta investive brenda Kosovës. Në këtë rrugëtim Klubi i Biznesit ofron bashkëpunim dhe partneritet me gjithsecilin që beson në një ekonomi të lirë të tregut, dhe rolin primar që duhet të ketë sektori privat në ekonomi”, thuhet në reagim.

Klubi i Biznesit është një iniciativë e disa nga korporatat më të mëdha kosovare, me synim bashkëpunimin e ndërsjellë vendor dhe ndërkombëtar, drejt rritjes së prosperitetit ekonomik dhe shoqëror në Kosovë dhe më gjerë. /Telegrafi/