Diplomat në Ukrainë kur nisi pushtimi nga Rusia – kush është Alexander Kasanof, pasuesi i Gabriel Escobarit

Alexander “Sasha” Kasanof është emëruar nga Departamenti Amerikan i Shtetit, të premten e 19 korrikut, në pozitën e Zëvendës Ndihmës Sekretarit për Ballkanin Perëndimor, si dhe për Shtypin dhe Diplomacinë Publike në Byronë për Çështjet Evropiane dhe Euroaziatike, pozitë kjo të cilën e kishte ushtruar Gabriel Escobar.

Në biografinë zyrtare të emisarit të ri të Biden për Ballkanin Perëndimor, tregohet se diplomati Kasanof kishte shërbyer si Këshilltar Politik në Ambasadën e ShBA-së në Kiev gjatë Revolucionit Maidan, në vitin 2014.

Ai po ashtu kishte qenë në të njëjtën detyrë në Kiev edhe në vitin 2022, kur kishte nisur pushtimit i Ukrainës nga Rusia.

Për kontributin në ambasadë, Kasanof kishte marrë edhe një çmim ekselencë për punën e tij aty.

Alexander “Sasha” Kasanof kishte shërbyer edhe si Asistent Ekzekutiv i ish-nënsekretares për Çështjet Politike, Victoria Nuland e ushtrues i detyrës së Nënsekretarit për Çështjet Politike, John Bass.

Lexo po ashtu Alexander Kasanof në vend të Gabriel Escobar - zëvendësndihmës sekretar për Ballkanin Perëndimor

Poashtu, tashmë Zëvendës Ndihmës Sekretar për Ballkanin Perëndimor, më parë kishte shërbyer edhe jashtë shtetit, si në Ukrainë, Irlandë, Turkmenistan dhe në Kili.

Kasanof është i diplomuar në Kolegjin Kombëtar të Luftës, Shkollën Johns Hopkins të Studimeve të Avancuara Ndërkombëtare dhe Kolegjin Hamilton, ndërsa flet disa gjuhë: frëngjisht, italisht, rusisht dhe spanjisht.

Detyrat e Sashës në Washington përfshijnë:

Drejtor i Zyrës së Politikave dhe Programeve Globale në Byronë e Çështjeve Ndërkombëtare të Narkotikëve dhe Zbatimit të Ligjit;

Zëvendësdrejtor i Stafit të Sekretariatit Ekzekutiv (“Linja”);

Drejtor i Zyrës së Çështjeve të Evropës Lindore dhe Zëvendësdrejtor i Zyrës së Çështjeve të Kaukazit dhe Konflikteve Rajonale.