Kievi nën sulme, alarme për sulme ajrore gjithandej – këto janë zhvillimet e fundit rreth luftës në Ukrainë

Sirenat e sulmit ajror ranë në të gjithë Ukrainën herët të premten, ndërsa kryebashkiaku i Kievit raportoi shpërthime në kryeqytet.

Ndërkohë, disa rajone ruse, duke përfshirë Kursk dhe Belgorod, po përballen me sulmet e tyre, për të cilat zyrtarët rusë kanë fajësuar Ukrainën – megjithëse Kievi mohon përfshirjen e drejtpërdrejtë, shkruan CNN, përcjell Telegrafi.

Më poshtë ua sjellim të rejat e fundit rreth luftës në Ukrainë:

Sulmi në Kiev: Kryetari i bashkisë së qytetit tha të premten herët se “një tjetër valë e UAV (mjete ajrore pa pilot) po shkon drejt Kievit”, duke shtuar: “Mbrojtja ajrore po funksionon”.

Kjo pason një sulm me raketa në kryeqytet një ditë më parë, i cili vrau tre persona, përfshirë një vajzë 9-vjeçare, e cila thuhet se kishte tentuar të hynte në një strehë për bomba që ishte e mbyllur.

Sulmet brenda Rusisë: Dhjetëra sulme kanë ndodhur në rajonin kufitar të Belgorodit të Rusisë gjatë ditës së kaluar, që dyshohet se janë kryer nga forcat ukrainase, sipas guvernatorit të rajonit.

Ndërkohë, rajoni perëndimor rus i Kurskut rrëzoi disa dronë ukrainas, tha guvernatori i rajonit të premten herët, duke u kërkuar banorëve të qëndrojnë të qetë.

Luftëtarët disidentë rusë: Një grup shtetasish rusë anti-Putin pretenduan të enjten se po luftonin brenda territorit rus, gjë që ushtria ruse e ka mohuar. Një grup i dytë i ngjashëm tha se ishte “afër kufirit” me Rusinë. Të dy grupet janë në linjë me forcat e mbrojtjes ukrainase – por zëvendësministri i Jashtëm i Ukrainës i tha CNN të enjten se vendi “nuk ka asnjë përgjegjësi” mbi grupet që “po veprojnë vetë”.

Viktimat ruse: Një zëdhënës i Grupimit Lindor të Forcave të Armatosura të Ukrainës pohoi se rreth 208,000 ushtarë rusë janë vrarë që nga fillimi i luftës. CNN nuk ka qenë në gjendje të konfirmojë në mënyrë të pavarur këto shifra dhe Ministria e Mbrojtjes e Rusisë nuk ka lëshuar përditësime mbi viktimat e saj që nga shtatori i kaluar, kur tha se më pak se 6,000 ushtarë rusë ishin vrarë.

Aplikimet për anëtarësim në NATO: Anëtarësimi i mundshëm i Suedisë dhe Ukrainës në aleancën ushtarake ishte fokusi kryesor në një takim jozyrtar të ministrave të jashtëm të NATO-s të enjten. Zyrtarët e NATO-s shpresojnë të pranojnë Suedinë deri më 11 korrik, por Turqia dhe Hungaria deri më tani e kanë bllokuar një gjë të tillë.

Shefi i NATO-s i tha CNN se ata nuk mund ta bëjnë Ukrainën një anëtare të plotë në mes të luftës – por do të vazhdojnë t’i ofrojnë Kievit mbështetje dhe të ndërtojnë një udhërrëfyes për Ukrainën për t’u bashkuar me NATO-n pas luftës. /Telegrafi/