KFOR: Njësia Speciale e Policisë së Kosovës mund të kryej detyrat e saja në gjithë territorin e vendit

Në veri të Kosovës, ku jetojnë më së shumti banorë me përkatësi etnike serbe, është shtuar prezenca e njësiteve ushtarake të KFOR-it.

Rritjen e prezencës së trupave në këtë zonë e kishte konfirmuar edhe shefi i NATO-s, Jens Stoltenberg.

Në veri të Kosovës më 31 korrik dhe 1 gusht u rritën tensionet, pasi serbët lokalë ngritën barrikada për të kundërshtuar dy vendime të Qeverisë së Kosovës: atë për targat dhe dokumentet serbe.

Misioni i NATO-s në Kosovë, KFOR, vazhdimisht ka përsëritur se është i gatshëm të ndërhyjë nëse rrezikohet stabiliteti në veri të Kosovës.

Mirëpo pos KFOR-it dhe EULEX-it përgjegjës për situatës e sigurisë në Kosovë janë edhe Policia e Kosovës dhe Ushtria e Kosovës (FSK).

Mirëpo për praninë dhe veprimtarinë  e tyre në atë pjesë të Kosovës ka pasur kundërshtime të vazhdueshme nga pala serbe.

Mediumi në gjuhën serbe Radio “KIM” e ka pyetur KFOR-in nëse në veri mund të veprojnë edhe Njësia Speciale e Policisë së Kosovës dhe FSK.

KFOR-i, në përgjigjen e tyre, e kanë ritheksuar se Policia e Kosovës mund të veprojë në çdo pjesë të vendit, derisa për Forcën e Sigurisë së Kosovës, thonë se duhet të ndërveproj me KFOR-in në atë pjesë.

“Policia e Kosovës dhe Forcat e Sigurisë së Kosovës janë pjesë e institucioneve vendore që merren me sigurinë. Policia mund të kryejë detyrat e veta në tërë territorin e Kosovës, pa kufizime gjeografike. Çdo lëvizje e Forcës së Sigurisë së Kosovës drejt pjesës veriore kërkon njoftim paraprak dhe pëlqimin e komandantit të KFOR-it, kjo është në përputhje me marrëveshjen e mëparshme dhe NATO pret që institucionet vendore të vazhdojnë ta zbatojnë atë marrëveshje”, kanë thënë nga KFOR-i për këtë medium.

Forca e Sigurisë së Kosovës, sipas një marrëveshjeje të mëparshme të vitit 2013, duhet të autorizohet nga komandanti i KFOR-it para çdo dislokimi në veri të Kosovës.

Policia e Kosovës mund të lëvizë lirshëm në mbarë Kosovën./Telegrafi/