Izraeli konfirmon se po mban drejtorin e spitalit të Gazës

Izraeli ka konfirmuar se po mban drejtorin e një prej spitaleve të fundit funksionale në veri të Gazës pas raportimeve për arrestimin e tij javën e kaluar.

Dr. Hussam Abu Safiya u mbajt së bashku me dhjetëra personel të tjerë dhe u dërgua në një qendër marrje në pyetje gjatë një bastisjeje në spitalin Kamal Adwan më 27 dhjetor.

Ushtria izraelite tha se ata kishin në shënjestër spitalin pasi po përdorej si një qendër komandimi nga militantët e Hamasit, shkruan skynews, përcjell Telegrafi.

Tani, Forcat Mbrojtëse të Izraelit (IDF) kanë konfirmuar se mjeku është mbajtur nën dyshimin për “përfshirje në aktivitete terroriste”, por nuk kanë bërë të ditur vendndodhjen e tij.

Ai “aktualisht po hetohet” nga forcat izraelite të sigurisë, thuhet në deklaratë.

Bëhet e ditur se aktivistët e të drejtave të njeriut kanë ngritur shqetësime për mirëqenien e Dr. Abu Safiya, me organizatën Euro-Med Human Rights Monitor duke thënë se kishte marrë informacione se shëndeti i tij ishte përkeqësuar.

Konfirmimi i ndalimit të mjekut vjen pasi sulmet izraelite vranë të paktën 30 njerëz në Gaza, duke përfshirë fëmijë, gjatë natës, sipas stafit të Al Aqsa Martyrs, një tjetër spital në enklavë.

Ushtria izraelite tha përsëri në një deklaratë se kishte goditur pikat e grumbullimit të Hamasit dhe qendrat komanduese.

Në fillim të kësaj jave, një raport i ri nga Zyra e OKB-së për të Drejtat e Njeriut tha se sistemi shëndetësor i Gazës po sillet “në prag të kolapsit total” nga sulmet e Izraelit mbi dhe përreth spitaleve në rajon.

Raportohet se të paktën 10 spitale janë sulmuar nga forcat izraelite që nga fillimi i luftës, disa herë të shumta.

Ndryshe, spitali Kamal Adwan është goditur disa herë gjatë tre muajve të fundit. /Telegrafi/