India pritet të bëhet vendi i parë që zbarkon në polin jugor të Hënës

India pritet të bëjë histori të mërkurën duke u bërë vendi i parë që zbarkon një anije kozmike pranë polit jugor të Hënës.

Një nga qëllimet kryesore të misionit është gjetja e akullit, për të cilin shkencëtarët thonë se në të ardhmen baza e njerëzve atje do të mund të jetojë me këtë sasi uji, transmeton Telegrafi.

Nëse misioni Chandrayaan-3 rezulton i suksesshëm, India do të jetë vetëm vendi i katër që arrin një zbarkim të suksesshëm në Hënë.

Përpjekja e Indisë vjen vetëm disa ditë pasi zbarkuesi rus Luna-25 u rrëzua kur u përpoq të zbriste në të njëjtin rajon.

Poli jugor i Hënës ka një potencial të veçantë në kërkimin e akullit. Sipërfaqja që mbetet në hije të përhershme atje është e madhe dhe shkencëtarët thonë se kjo do të thotë se ekziston mundësia e ujit në këto zona.

SHBA-ja, ish-Bashkimi Sovjetik dhe Kina kanë arritur të gjitha të zbarkojnë pranë ekuatorit të Hënës – por asnjëra nuk ka udhëhequr misione të suksesshme në polin e saj jugor.

Përpjekja e Indisë për misionin e saj Chandrayaan-2 pranë polit jugor në vitin 2019 ishte e pasuksesshme – zbarkuesi u përplas në sipërfaqen hënore.

Tani e gjithë vëmendja u fokusuar tek misioni Chandrayaan-3 – misioni i saj i tretë në Hënë.

Anija kozmike me një orbiter, zbarkues dhe një rover u ngrit më 14 korrik nga qendra hapësinore Sriharikota në Indinë jugore.

Zbarkuesi- i quajtur Vikram sipas themeluesit të Organizatës Indiane të Kërkimit Hapësinor (Isro), Vikram Sarabhai – mban roverin 26 kg të quajtur Pragyaan. /Telegrafi/