Hoti: Projektet e Marrëveshjes së Washingtonit nuk mund të anulohen, shtyrja e tubacionit të gazit amerikan ishte gabim

Ish-kryeministri i Kosovës, Avdullah Hoti ka thënë se shtyrja për një vit të projektit të gazit amerikan përmes Korporatës së Sfidave të Mijëvjeçarit (MCC) ishte gabim.

Hoti më anë të një shkrimi në Facebook, ka theksuar se projektet e Marrëveshjes së Washintonit nuk mund të shtyhen, duke shtuar se këto janë interes strategjik i Kosovës dhe i Shteteve të Bashkuara të Amerikës.

“Shtyrja e projektit të gazit përmes MCC për një vit ishte gabim. Megjithatë, mirë që po e kuptojnë se projektet e Marrëveshjes së Washingtonit mund të shtyhen, por nuk mund të anulohen. Ato projekte janë interes strategjik i Kosovës dhe i SHBA-së. Duhet pasur vizion euro-atlantik për të ardhmen e shtetin e Kosovës për të kuptuar rëndësinë strategjike të këtyre projekteve”, ka theksuar Hoti, shkruan Telegrafi.

Deputeti i Lidhjes Demokratike të Kosovës, thotë se kjo Marrëveshje mbetet më e rëndësishmja që ka nënshkruar vendi ynë që nga shpallja e pavarësisë.

“Furnizimi me gaz dhe hekurudha për Durrës janë dy nga këto projekte që do ta transformojnë ekonominë e Kosovës, siç e ka transformuar autostrada Prishtinë-Durrës e ideuar nga Presidenti Rugova. Marrëveshja e Washingtonit, e nënshkruar në Zyrën Ovale të Shtëpisë së Bardhë, mbetet marrëveshja më e rëndësishme që ka nënshkruar Kosova që nga shpallja e pavarësisë. Zoti e bekoftë miqësinë e Kosovës me SHBA-në”, ka përfunduar ai.

Me ndërmjetësimin e Shteteve të Bashkuara të Amerikës, më 4 shtator 2020, Kosova dhe Serbia kanë nënshkruar dokumentin për normalizim ekonomik, e njohur si Marrëveshja e Washingtonit.

Marrëveshja që përmban 16 pika është nënshkruar në Shtëpi të Bardhë në prani të ish-presidentit të SHBA-së, Donald Trump.

Qeveria e Kosovës ka nisur procedurat për marrjen e grantit nga MMC-ja në vlerë mbi 200 milionë euro, për investime në sektorin e energjisë elektrike.

Ministrja e Ekonomisë, Artane Rizvanolli ka bërë të ditur se nga ky projekt, Kosovës për 15 vite do t’i ofrohen investime të cilat do të jenë në të mirë të stabiliteti energjetik. Ajo ka shtuar se projekti pritet që të hidhet për votim në bordin e MCC-së në qershor të këtij viti. /Telegrafi/